ރައްޔތިންގެ މަޖިލީހަކީ ރައްޔިތުން ތަމްސީލް ކުރާ ރައްޔިތުންގެ ޙާދިމުން ތަކެއް ތިބެން ޖެހޭ ތަނެކެވެ. ރައްޔިތުންނާއި ސީދާ ގުޅުންހުރި އެކި ބިލް ތަކަށް ބަހުސްކޮށް ގޮަތް ނިންމަން ތިބޭ ރައްޔިތުންގެ ޙާދިމުންތަކެކެވެ. މަޖިލީހުގެ ތަޅުމަކީ ބިލްތަކަށް ބަހުސް ކުރުމަށް ނުހަނު ގިނަ ދިރާސާކޮށް ތައްޔާރުވެގެން ނުހަނު ބޮޑު ޒިންމާއެއް އުފުލަން ހާޒިރުވާން ޖެހޭ ތަޅުމެކެވެ. ނަމަވެސް ފެންނަނީ އެމަންޒެއް ނޫނެވެ. ތަޅުމުގައި މިހިގަނީ ކޮން ބިލަކާ ގުޅޭ ބަހުސެއްކަން އިގެނީ ޖެހިގެން އިން މެމްބަރު މައިކުން އެއްޗަކާއި އެއްޗެއް ކިޔަން ފަށާ އަޑަށެވެ. އެހާލުގައި ދާއިރާއަށް ކަމެއް ކުރާކަން ދެއްކެން، ޓީވީއިން ޖަލްސާ ދައްކާތީ އާއި އެކު، ތެދުވެ މޮޅު ވާހަކައެއް ދެެއްކޭތޯ ތެޅިގަންނަނީއެވެ. ބިލުން ނިކަމެތި ރައްޔިތުމީހާއަށް ކުރަނީ ކޮން އަސަރެއްކަމެއް، ހުރި އުނި ކަންކަކަމަކީ ކޮބައިކަމެއް، ގެންނަންވީ އިސްލާހު ތަކަކީ ކޮބައިކަމެއް އަދި ތަންފީޒު ކުރަން ހުރި ހުރަސް ތަކަކީ ކޮބައިކަމެއް ނޭގޭނެއެވެ. ކުއްލިއަކަށް ތެދުވެ ހިތއް އަހައި އެއްޗެއް ގޮވަން ހަދައިގެން ދީނާ ޙިލާފު ވާހަކައެއް ދެއްކޭއިރުވެސް، މީހުންގެ އަބުރައް އަރައިގަނެވޭއިރުވެސް، ބަޔަކަށް ފުރައްސާރަ ކުރެވޭ އިރުވެސް އޮންނަނީ ނޭގިފައެވެ
ރައްޔިތުންގެ މަޖިލީހަށް މެމްބަރުން ހޮވަނީ ރައްޔިތުންނެވެ. ވާ ވައުދުތަކަކީ ކިހިނެތް ފުއްދާނެ ވައުދުތަކެއްތޯ ކުރިމަތިލާ ކެންޑިޑޭޓުންގެ ކިބައިން ސުވާލުކޮށް ސާފުކުރުމުގެ ޒިންމާ އޮތީ ރައްޔިތުންގެ ބޮލުގައެވެ. މާޒީގައި ކިހިނެތް ކަންތައްކޮށްފައި ހުރި މީހެއްތޯ އަދި ތައުލީމީ ފެންވަރު ބެލުމުގެ ޒިންމާވެސްމެއެވެ
ތައުލީމީ ފެންވަރު ދަށް ބަޔަކު މަޖިލީހަށް ހޮވާފައި، މަޖިލީހަށް ކުރިމަތިލެވޭނެ ވަކި ތައުލީމީ ފެންވަރެއް ޤާނޫނަކުން ކަޑައަޅަން ޖެހޭ ކަމަށް ގޮވުމުގެ ބޭނުމަކީ ކޮބައިތޯއެވެ. ނުކިޔަވާ ހުއްޓަސް މޮޅުމީހަކު ހުރެދާނެއެވެ. އިހްލާސްތެރި ތެދުވެރިވެދާނެއެވެ. ކިޔަވައިގެން ހުއްޓަސް މަކަރުވެރި ނުލަފާމީހަަކަށް ވެދާނެއެވެ. އެހެންކަމުން ކޮންމެ ފަރުދަކަށްވެސް ރައްޔިތުން ތަމްސީލްކޮށް ޙިދުމަތް ކުރުމެގެ ފުރުސަތު ފަހިވާންވާނެއެވެ. ރައްޔިތުން ބޭނުންވަނީ ތައުލީމީ މީހެެއް ނަމަ ރައްޔިތުން އެފަދަ މީހަކު ވޯޓުން ހޮވާނީއެވެ. ޤާނޫނަކުން ވަކި ބަޔަކަށް ދޮރު ބަންދުކުރުމުގެ މާނައެއް ނެތެވެ
ހަމަ މި އުސޫލުން މަޖިލީހަށް ކޮރަޕްޓް ވިޔަފާރިވެރިން ތަކުރާރުކޮށް ހޮވާފައި އެއީ ވިޔަފާރިވެރިންގެ މަޖިލީހެކޭ ގޮވުމުގެ މާނައެއް ނެތެވެ. ވިޔަފާރިވެރިޔާ ގޯހުން ނަމަވެސް އެކުރީ ވިޔަފާރިއެކެވެ. އިންވެސްޓްމެންޓެކެވެ. ފަސް އަހަރު ދުވަސް ތެރޭ އޭނާ ދެން ކުރާނެ ކަމަކީ މަޖިލިސް ތަޅުމުގައި ބިލްތަކަށް ވޯޓު ވިއްކައިގެން ކުރި އިންވެސްޓްމެންޓް ކަވަރ ކޮށް ފައިދާ ޖެއްސޭތޯ ބެލުމުވެ. ހަޤީގަތުގައި ރައްޔިތުމީހާ ވޯޓު ފައިސާއަށް ދޫކޮށްލާ ހިސާބުން، އެ ރައްޔިތުމީހާ ތަމްސީލް ކުރާ މެމްބަރަކު މަޖިލީހަކު ނުހުންނާނެއެވެ. އެހެނީ އެކުރެވުނީ ވިޔަފާރީގެ މުއާމަލާތެކެވެ. ފައިސާގައި ހިފުމަށްފަހު ވޯޓު ދޫކޮށްލާ ހިސާބުން ވިޔަފާރީގެ މުއާމަލާތް ނިމުނީއެވެ. ދެން މެމްބަރުގެ ފަރާތުން ކަމެއް އުއްމީދު ކުރުމުގެ ހައްޤެއް ވޯޓު ވިއްކާލި ރައްޔިތުމީހާ އަކަށް ނޯންނާނެއެވެ. ވިޔަފާރިވެރިޔާ އޭނާގެ މަސައްކަތް ވަރަށް ބަރާބަރަށް އެބަ ކުރޭނޫންތޯއެވެ. ޒިންމާ އަދާ ނުކުރީ ރައްޔިތުމީހާ ނޫންތޯއެވެ. އެހެނީ ވޯޓު ވިއްކާލީ އޭނައެވެ
އަޅުގަނޑު ކުޑައިރުގެ ހާދިސާއެކެވެ. ރ އަތޮޅު ރަށަކަށް އާއިލާ އާއި އެކު ގޮސް އުޅެނިކޮށް ފެނުނު މަންޒަރެކެވެ. ހަވީރުގެ ވަގުތެއްގައި ރަށުގެ ޒުވާނުން ތަކެއް ވެލި ދަޑުގައި ފުޓްބޯޅަ މެޗެއް ކުޅޭތީ އެ މަންޒަރު ބަލަން ހުރީމެވެ. ވަކި ހިސާބަކުން ފެން ބޯލާ ވަރުބަލި ފިލުވާލުމަށް ދެ ޓީމުންވެސް ހުސް ވަގުތު ކޮޅެއް ނެގިއެވެ. ޒާތެއްގެ ހާފް ޓައިމް ބްރޭކް އެކެވެ. ދެ ޓީމުގެ ޒުވާނުންވެސް އައިސް އިށީނީ އަޅުގަނޑު އިން ހިސާބާ ދާދި ކައިރީގައެވެ. އިށީންތަނާހެން، މެދު އުމުރުގެ މީހަކު އައިސް ދެ ޓީމްގެ ޒުވާނުންނާއި ވެސް މުހާތަބްކޮށް ވާހަކަދައްކަން ފަށައިފިއެވެ. އެބޭފުޅާ އެއުޅެނީ މަޖިލީހަށް ކުރިމަތިލައިގެން ކަމާއި، ޒުވާނުންގެ ވޯޓު ވަރަށް މުހިންމުކަމުގައި ދެންނެވިއެވެ. އަދި އެއްވެސް ކަހަލަ އެހީއެއް ބޭނުންތޯ އަހާލިއެވެ. ޖަވާބުގައި ޖާޒީ ބަޔަކާއި އާ ބޯޅައެއް ވަރަށް ބޭނުންކަމުގައި ދެ ޓީމުގެ ޒުވާނުންވެސް ބުންޔެވެ. ކެންޑިޑޭޓް ދެންނެވީ އެއްވެސް މައްސަލައެއް ނޯންނާނެކަމަށާއި، އެކަން ހަމަޖެހޭނެކަމުގައެވެ. ކޮންމެވެސް ތަނެއްގެ އެޑްރެސް ބުނެފައި ދެންނެވީ އޭގެ އަނެއް ދުވަހު އެތަނަށް ދިޔުމަށެވެ. އެއަށްފަހު ކަންވީ ގޮތެއް އަޅުގަނޑަކަށް ނޭގެއެވެ. ނަމަވެސް އެ ޒުވާނުން ވޯޓު ދިންނަމަ، އޭގެ މާނައަކީ ބޯޅައަކާއި ޖާޒީ އަކަށް ކޮންމެ މީހަކު ވޯޓު ވިއްކާލީނޫންތޯއެވެ. ޖާޒީ ލިބޭ ހިސާބުން މުއާމަލާތް ނިމުނީއެވެ. ހޮވޭފަހުން މެމްބަރު އެ ޒުވާނުންނަށް ކޮށްދޭންޖެހޭނެ ކަމެއް ނޯންނާނެއެވެ. އަދި އެ ޒުވާނުންނަށް މެމްބަރު ކަމެއް ނުކޮށްދީގެން ސަކުވާ ކުރުމުގެ ހައްޤެއްވެސް ނޯންނާނެއެވެ. މިގޮތަށް ވަކި ބަޔެއްގެ ވޯޓު ކަށަވަރުކޮށްލާފައި ބައެއް މެމްބަރުން ދާއިރާގެ ބާކީ ރައްޔިތުންނަށް އެއްވެސް ފަރުވާލެއް ނުދެއެވެ. ބާކީ ތިބި ރައްޔިތުންގެ އެއްވެސް ބޭނުމެއް އެއްކަލަ ވިޔަފާރި ވެރިޔާއަކަށް ނޯންނާނެތާއެވެ. އެހެނީ ވިޔަފާރިވެރިޔާ ބަލާނީ ވީހާވެސް ކުޑަ ހަރަދެއްގައި ބޮޑު ފައިދާ ޖެހޭތޯއެވެ. ހޮވޭނެކަން ކަށަވަރުވާ ވަރަށް ވޯޓު ގަނެވުމުނެ އޭނައަށް ނިމުނީއެވެ. ވޯޓު ވިއްކި ބަޔަކާއި ހެދި މުޅި ދާއިރާއަށް ގެއްލުމެވެ
ކަން މިހެން އޮތަސް ފެންނަ މަންޒަރު ވަރަށް ތަފާތެވެ. ހައިރާން ކުރުވާ ފަދަ މަންޒަރެކެވެ. އެއްކަލަ ވިޔަފާރިވެރިޔާ މަޖިލީހުގައި ކަންކުރާ ގޮތުން ވޯޓު ވިއްކި ރައްޔިތުމީހާވެސް ކުއްވެރިކުރަނީ ދެންތިބީންނެވެ. މިގޮތުން އެންމެ ފަރިތަކޮށް ކިޔާ އެއް ލަވަ އަކީ އޭނަ ގޯސް މީނަ ގޯސް، ރަނގަޅު އެކަކުވެސް ނެތޭ އެވެ. ތިމާ މީހާގެ ހަމަ އެއްވެސް ޒިންމާއެއް ނެތް ފަދައެވެ. އަނެއްކާވެސް ދެވަނަ އިންތިހާބަކަށް އެއްކަލަ ވިޔަފާރިވެރިޔާ ފާޅުވާނެއެވެ. ނަމަވެސް ވޯޓޫ ވިއްކި ރައްޔިތުމީހާ އެ ވިޔަފާރިވެރިޔާގެ މޫނު މައްޗަކަށް އެއްޗެކޭ ނުބުނާނެއެވެ. މަދު މީހަކު ބުނެފާނެއެވެ. ގިނަ މީހުން ކިޔާނީ އާދެ ލައްބަ އެވެ. ބަދަލުގައި އެ ވިޔަފާރިވެރިޔާއާއި ވާދަކުރަން ޒުވާނަކު، ހާއްސަކޮށް އަތުގައި ލާރި ނެތް ނިކަމެތި އާއިލާއަކުން ކުއްޖަކު ނުކުމެއްޖެނަމަ، އެއްކަލަ ވިޔަފާރި ވެރިޔާއާއި ދިމާލަށް ގޮވާލަން އޮތް ގޮވެލިފަތި ގޮވާލާނީ އެ ޒުވާނާ އާޢި ދިމާލަށެވެ. ތިއީ ހަމަ ހުސް އެކައްޗެކޭ، ހުސް ކޮރަޕްޓް ބައެކޭ، ރައްޔިތުންނަށް ހެޔޮ އެދޭ ބަޔަކު ނޫޅޭ ކިޔާފައެވެ. ވިޔަފާރި ވެރިޔާ އާއި ދިމާލަށް އެއްޗެއް ނުގޮވީ ވަގުތީ ސިޓީ އުރައެއް ނަމަވެސް ދިއްކޮށްލަފާނެ ކަމުގެ އުއްމީދުގައެވެ
މިމޭރުމުން ކަންތައް ކޮށްފައި، ޒުވާނުން ސިޔާސީ ދާއިރާއަށް ނުކުމެގެންނޭ މިދާއިރާވެސް ޤައުމުވެސް ރަނގަޅުވާން އޮތީ ކިޔަނީވެސް ހަމަ ރައްޔިތުންނެވެ. ވިޔަފާރިވެރިންގެ މަޖިލީހެކޭ ކިޔަނީވެސް ހަމަ ރައްޔިތުންނެވެ. ދައްކާ ވާހަކައާއި ދިމާ އިދިކޮޅަށް ކަންތައް ކުރަނީ ވެސް ހަމަ ރައްޔިތުންނެވެ. މަޖިލީހުގައި ތިބި ބަޔަކު ދައްކާ ވާހަކައަށް މަލާމާތްކޮށް ބޮލުގައި ތެއްކަމެއް ނެތް ބަޔެކޭ ކިޔަނީވެސް ހަމަ ރައްޔިތުންނެވެ. މަލާމާތް ކުރަން ތިބޭ އިރު އަތުގައި ދެއިރު ކާނެހާވެސް ނެތީ ހަމަ ރައްޔިތުންގެއެވެ. ހަފްތާއަކު ހަތަރު ދުވަހު މަސައްކަތް ކޮށްލާފައި ބޮޑު މުސާރަ ނަގައިގެން ބޮޑު ޗުއްޓީއަކަށް ދަނީ އެ މެމްބަރުންނެވެ. އަހަރުމެން އެތަނަށްލީ މެމްބަރުންނެވެ. އެހެންކަމުން ވިޔަފާރިވެރިންގެ މަޖިލީހެކޭ ކިޔޭކަށް ނެތްތާއެވެ. ޤައުމު ބަދަލުވާނީ ރައްޔިތުން މިފަދަ ކަންކަމަށް ހޭލައިގެންނެވެ
