ރައްޔިތުންގެ މަޖިލީހަށް މެމްބަރުން ހޮވަނީ ދާއިރާތަކުގެ ރައްޔިތުން ތަމްސީލު ކުރާށެވެ. ރައްޔިތުންގެ އަޑު އިއްވައި، ރައްޔިތުން އެދޭ ތަރައްޤީ ރައްޔިތުންނާއި ހަމައަށް ސަރުކާރު މެދުވެރިކޮށް ގެނެސްދޭން މަސައްކަތް ކުރާނެ ރައްޔިތުންގެ ޚާދިމެއް ގޮތުގައެވެ. ސިޔާސީ ޕާޓީއަކީ ޕްލެޓްފޯމް އެކެވެ. އެތައް ރައްޔިތުންނަކަށް ތިމާގެ އަޑު އިއްވައިލައިދޭ ވަސީލަތެކެވެ. ގިނަ ބައެއްގެ ވޯޓާއި އެކު ހޮވިގެން ދިއުމަށް ފަހު ޚިދުމަތް ކުރަން ޖެހެނީ ދާއިރާގެ ހުރިހާ ރައްޔިތުންގެ ޙައްޤުގައެވެ. ތިމާ ނިސްބަތްވާ ޕާޓީގެ މެމްބަރުންނަށް ބަލައިގެނެއް ނޫނެވެ. އަދި އެ މެމްބަރުންގެ ތެރެއިންވެސް ގާތް ވަކި އެކްޓިވިސްޓުންތަކެއް ހޮވައިގެނެއް ނޫނެވެ. ތިމާއަށް ވޯޓުލީ އަދި ނުލަނީ ކޮންބައެއްތޯ ބަލައިގެނެއް ނޫނެވެ. މަޖިލީހުގައި ތިމާ ތަމްސީލް ކުރަނީ އެންމެ ފުރަތަމަ ތިމާގެ ދާއިރާގެ ރައްޔިތުންކަން ހަނދާނުގައި ބަހައްޓައިގެންނެވެ. ޕާޓީ އަޔަސް އަންނާނީ އެއަށް ފަހުއެވެ
އިންތިހާބު ބޯމަތިވުމުން ގޭގެ ބަދިގެ ތެރޭގައި ކައްކަން ހުއްޓަވެސް އެއްކަލަ މެމްބަރު ފެނިދާނެއެވެ. ރައްޔިތުންނަށް ޚިދުމަތް ކުރުމުގައި ހަމަ އެންމެ ފުން މާނައިގައި އަވަދިނެތިއެވެ. ނަމަވެސް ހޮވުމަށްފަހު، ފަހަތުން ދުވިޔަސް ލޮލުކޮޅަށް ނުފެންނަ ކަމުގެ ޝަކުވާ އަކީ މަޖިލިސް މެމްބަރުންނާއި މެދު ރައްޔިތުންގެ ދުލުން އިވޭ އާންމު ޝަކުވާއެކެވެ. މެދުހެންވޭރުގައި މިކަން ތަފާތެވެ. ވޯޓަކާއި ޖެހުނަސް ނުޖެހުނަސް ދާއިރާގެ އެތައް ރައްޔިތުންނަކަށް މެމްބަރެއް ނުފެނެވެ. ވޯޓެއް ދޭނަންތޯ އަހާލަންވެސް ނާންނަނީއެވެ. ނަމަވެސް 3 ވަނަ ދައުރަކަށް ހޮވިއްޖެއެވެ. ނިސްބަތްވާ ޕާޓީގެ ޕީޖީ ގުރޫޕް ލީޑަރުވެސް މެއެވެ. ތަފާތު ދެއްތޯއެވެ. އެބޭފުޅާގެ އާއިލާ އަކީ ދާއިރާގެ ބޮޑު އާއިލާ އެކެވެ. މީގެ އިތުރުން އަމިއްލަ އަނބިދަރިން ބަނޑަށް ޖެހުނަސް، އަވައްޓެރިން މަގުމަތި ވިޔަސް ހެޔޮ ކަމަށް ޕާޓީ ރޫހުގައި ވޯޓުލާ ބައެއް އެކްޓިވިސްޓުންގެ އެހީގައި ގޮނޑި އޮންނަނީ ކަށަވަރުވެފައެވެ. ބާކީ ތިބި ރައްޔިތުންނަކީ އެބޭފުޅާއަށް ބޭކާރު ބައެއް ފަދައެވެ. ޒާތެއްގެ އާއިލީ ވެރިކަމެކެވެ
ޙުދުމުޚުތާރުކަން ހުރީ ހަމައެކަނި ދާއިރާ ތެރެއަކުން ނޫނެވެ. ޕާޓީ ތެރޭގައިވެސް މެއެވެ. ރާއްޖޭގެ އެންމެ ބޮޑު އެއް ސިޔާސީ ޕާޓީއެވެ. އެންމެ ފަހުން ބޭއްވުނު އިންތިހާބުގައި މަޖިލީހުގެ ސުޕަރ މެޖޯރިޓީ ވެސް ލިބުނެވެ. ނަމަވެސް ޕީޖީ ލީޑަރ ކަމަށް ކުރިމަތިލާން ހުޅުވާލުމުން އެބޭފުޅާ ނަން ހުށަހެޅުމާއެކު އެހެން މެމްބަރެއްގެ ނަމެއް ނުދެއެވެ. ނަމުގައިވެސް ‘ޑެމޮކްރެޓިކް’ އޮތް ޕާޓީގެ ޕީޖީ ލީޑަރ ހޮވުނީ އޮޓޮމެޓިކުން އިންތިހާބަކާއި ނުލައެވެ. ނަމަވެސް ހިތާމައަކީ ޕީޖީ ލީޑަރ މެދުހެންވޭރަށް ލިބުނަސް ދާއިރާއަށް ވާ މޮޅެއް ނެތުމެވެ. ގޮނޑީގައި އިނދެ، ތިންވަނަ ދައުރު ގުނަމުން ދާއިރު ހިޔާވަހިކަން ގެއްލޭ ބައެއްގެ ހިޔާވަހިކަން ގެއްލެނީއެވެ. އަތްމަތި ދަތިވެ ސަލާން ޖަހާ ބަޔަކު ސަލާން ޖަހަނީއެވެ. ކުއްކުރުން އިތުރުވެ ދާއިރާ ބޮޑު ނާމާންކަމަކަށް ވެއްޓެނީއެވެ. މެމްބަރާއި ދާއިރާއާއި ވާކަމެއް ނޫނެވެ. ދާދި އިހަކަށް ދުވަހު ބިދޭސީ ސިފައިންނަށް ރާއްޖޭގައި ތިބެވޭނެހެން ހެދި އެއްބަސްވުން ހާމަ ކުރުމަށް ގޮވާލާ މަޖިލީހަށް ވެއްދި ކުއްލި މައްސަލައިގައި އެބޭފުޅާ، އެ އެއްބަސްވުން ހާމަކުރަން ނުޖެހޭނެކަމަށް ގޮވާލާ މިއިން ޒަމާނަކު މަޖިލިސް ތެރޭގައި ވާހަކަ ނުދައްކާ ވަރަށް ވާހަކަދައްކާލިއެވެ. ބޭރު މީހުންނަށް ބިން މިލްކް ކުރެވޭ ބިލަށް އަދި އެއަށްވުރެ ފޯރީގައި ވޯޓު ލިކަން ވެސް ތާރީޚުން ފެންނަން އެބައޮތެވެ. 3 ދައުރު ގޮޑީގައި އިންނެވި އިރު ބޯހިޔާވަހިކަމުގެ މައްސަލާގައިވެސް އެވަރަށް އެންމެ ފަހަރަކުވެސް ވާހަކަދައްކާލި ނަމަ ކިހާ ރަނގަޅުވީސް ހެއްޔެވެ. ނަމަވެސް މި ބޭފުޅާއަކީ ގޮޑި ޔަޤީން ބޭފުޅެއް ކަމުން، ހޮވުމުގެ ކުރިންވެސް، ހޮވުމަށް ފަހުންވެސް އެއީ ޕާޓީގެ ޚާދިމެކެވެ. ދާއިރާގެ ރައްޔިތުންގެ ޚާދިމެއް ނޫނެވެ
ނަމަވެސް އެވެސް އަދި މުޅިއަކުން ތެދެއް ނޫނެވެ. ޕާޓީ ތެރެއިންވެސް އަޅާލަނީ ވަކި ބަޔަކަށެވެ. އަޅުގަނޑުގެ ބައްޕައާއި ކާފަ އަކީ އެ ބޭފުޅާ ނިސްބަތްވާ ޕާޓީގެ މެމްބަރުންނެވެ. ދާދި ގާތް ގާތުގައި ދެމީހުންވެސް މިދިޔަ އަހަރު ވަނީ ނިޔާވެފައެވެ. މޫނު ދެކިލަން ނައިތާންގައި، ތައުޒިޔާގެ މެސެޖްގަޑެއްވެސް ކޮށްނުލައެވެ. އެއީ އަމިއްލަ ދާއިރާގެ ޕާޓީ މެމްބަރުންނާއި ވެސް އެބޭފުޅާ ހުރި ދުރުމިނެވެ. އިންތިހާބެއް ބޯމަތިވުމާއިއެކު، ވޯޓެއް ލިބޭތޯ ނައުމަކުން ހައިރާންވާކަށް ނުޖެހޭތާއެވެ
ރާއްޖޭގެ އެހެނިހެން ރަށްރަށުގައި، ބަނދަރެއް އަޅާލިޔަސް ރަށު ރައްޔިތުންގެ ޚިޔާލު ހޯދައެވެ. ކައުންސިލް މެދުވެރިކޮށެވެ. މަޖިލީސް މެމްބަރުން މެދުވެރިކޮށް، ރައްޔިތުން އެދޭ ގޮތަށް މަޝްރޫޢު ކުރިއަށް ގެންދަން މަސައްކަތް ކުރެއެވެ. ނަމަވެސް މާލޭގައި އެކަން ތަފާތެވެ. މި ރަށް އެ ފުށް މި ފުށަށް ޖެހިޔަސް އެއީކީ މާލޭ މީހަކާ ބެހޭ ކަމަކަށް ނުވެއެވެ. ސަބަބަކަށް ވަނީ މާލޭގެ ދާއިރާތަކަށް ހޮވިފައި ތިއްބެވި މެމްބަރުން އުޅުއްވަނީ ރައީސުލް ޖުމްހޫރިއްޔާގެ ނުވަތަ ޕާޓީ ލީޑަރުގެ މެމްބަރުން ތަކެއްގެ ގޮތުގައެވެ. މެދު ހެންވޭރު އުޅެނީ މިކަމުގައިވެސް ތަންކޮޅެއް ކުރީގައެވެ. ސިޓީ ކައުންސިލްގައި މިދާއިރާއަށް ގޮޑިއެއް އިންނަހެން ހީވެސް ނުވެއެވެ. މަޖިލިސް މެމްބަރު، ރައްޔިތުންނާއި ދުރުތާނގައި ކައުންސިލް މެމްބަރުވެސް އެހާ ދުރެވެ
މި ހިސާބުން، މެދުހެންވޭރު ދާއިރާގެ މެމްބަރާއި މިހާތަނަށް އަޅުގަނޑާއި ބައްދަލުވި ހަމައެކަނި ފަހަރުގެ ވާހަކަ ޙިއްޞާކޮށްލާނަމެވެ. ދުވަހަކުވެސް އަދި ހަމަ ލޮލަކަށް ނުދެކެމެވެ. ބައްދަލެއް ނުވެއެވެ. މިހާރު 3 ވަނަ ދައުރަކަށް ހޮވިފައި އެވާ މެމްބަރާއި ދިމާކުރީ އަޅުގަނޑެވެ. ފޯނުންނެވެ. ލޮކްޑައުން ނިމުނުތާ ކައިރީގައި، އެބޭފުޅާގެ ނަންބަރު ހޯދައިގެން ކޮށްލީ ވަޓްސްއެޕް މެސެޖެކެވެ. ގުޅީފަޅުގައި ޕޯޓް އެޅުމުން މާލެ ރައްވެހިންގެ ބޯހިޔާވަހިކަމަށް އޮތް ޖާގަ ގެއްލެނީ ކަމުގައި ދަންނަވާ ކަންބޮޑުބުން ފާޅުކުރީމެވެ. އަދި އެބޭފުޅާގެ ޕާޓީގެ ކުރީ ވެރިކަމުގައިވެސް އެއީ ބޯހިޔާވަހިކަމަށް ޚާއްޞަކުރި ތަނެއް ނޫންތޯ އާއި، މިހާރު ކީއްވެތޯ ބަދަލުވީ ސުވާލު ކުރީމެވެ. މެސެޖް ފެނުމާއި އެކު، ވަޓްސްއެޕް އިން އަޅުގަނޑަށް ގުޅިއެވެ. ނަންބަރު ހޯދީ ކިހިނެތްތޯ ސުވާލު ކުރިއެވެ. އަދި ދިމާ ނުވެވޭ ދޯއޭ، ވަރަށް ދެރަކޮށޭ ތިވީ ބުނެލިއެވެ. ބޯހިޔާވަހިކަމުގެ ކަންބޮޑުބުން ފާޅުކުރުމުން، އާދެ ވަރަށް ދެރަކޮށް ދޯއޭ ކަންކަން ދަނީ ބުނެލިއެވެ. ދެން އަހާލީ ސުވާލެކެވެ. ދަރިން ތިބޭތޯއެވެ. އަޅުގަނޑު ނޫނެކޭ ދެންނެވީމެވެ. ވަރަށް ރަނގަޅޭ ދެންނެވިއެވެ. ވަންނާނެ ތަނެއް ނެތި ދަރިން ނުހޯދަން ނަސޭހަތް ދީފައި ކޯލް ނިންމާލިއެވެ. ރަނގަޅުތާއެވެ. އެބޭފުޅާ އާއިލާ އާއި އެކު އަރާމުގައި އުޅެންވީއެވެ. އަޅުގަނޑަށް އާއިލާއެއް ފެށުމުގެ ޙައްޤުވެސް ނެތީއެވެ
މިފަދަ މެމްބަރުން، އަދި މި ފެންވަރަށް ނުދިޔައެއް ކަމަކު، އެކި ދާއިރާތަކުގައި އެބަތިއްބެވެ. ހިތައް އަރަނީ އެ މެމްބަރުންނަށް ތަކުރާރުކޮށް ވޯޓްލައިގެން ހޮވަނީ ކޮން މޮޅެއް ވާތީބާވައެވެ
