ރަށަށް ނުކަތާ ވަރަށް އާބާދީ ބޮޑުވެ ތޮއްޖެހުމުގެ ސަބަބުން މާލެ އަކީ ސިއްހީ މައްސަލަތައް ގިނަ ތަނެކެވެ. އަބަދުވެސް ރަށުތެރޭގައި ބޮޑު ބަލިމަޑު ކަމެއް ފެތުރެއެވެ. ކޮންމެވެސް ހުމެއް ނުވަތަ ރޯގާއެކެވެ. ކުޑަ ކުޑަ ކުދިން އަބަދު ރޯގާ ޖެހި ކެއްސޭ އުޅޭ އުޅުން މިހާރު އާންމު ކަމަކަށް ވެއްޖެއެވެ. އެކި އެކި ޑޮކްޓަރީ ބޭސްތައް ޅަ އުމުރުން ފެށިގެން ކެއުން އާންމު ވެއްޖެއެވެ. މިފަދަ ބޭސް ކެއުން އާންމު ވުމުގެ ސަބަބުން އެ ބޭސްތަކުން ކުރާ އަސަރުވެސް ކުޑަވެއްޖެއެވެ
މަގުމައްޗަށް ކުނި ކޮތަޅު ނެރުމުގެ ސަބަބުން މަގުތައް ވަނީ ތަޤައްޔަރުވެފައެވެ. ބުޅާތައް ކޮތަޅުފަޅާލާ އޭގައި ހުރި ތަކެތި މަގުމައްޗަށް އެޅުމުން، އެ ނަގާނެ ބަޔަކު ނުވެއެވެ. ކުނިވެފައި އެތައް ދުވަހެއް މަގުތަކުގައި ހުރެއެވެ. ބުޅަލުގެ ނަޖިސްވެސް މަގުތަކުގައި އެހާގިނައެވެ. އަދި މިއާއެކު މީދާވެސް މިހާރު މަގުތަކުގައި އާންމުވެއްޖެއެވެ. ވާރޭވެހި ފެންބޮޑުވެއްޖެނަމަ މަގުތަކުގައި ހިގަން ޖެހެނީ މިހުރިހާ ނަޖިހެއް އެކުލެވޭ ފެނުގެ ތެރެއިންނެވެ. ކާބޯތަކެތި ގެންގުޅޭ ތަންތަނުގެ ސާފުތާހިރު ކަމުގެ މިންގަޑު ހުރި ނެތްވަރު ބަލާ މޮނިޓާރ ކުރާނެ ބަޔަކު ނެތެވެ. ދޭތެރެއަކުން މީސްމީޑިއާގައި ފޮޓޯގަނޑެއް އާންމުވުމުން، އެތަން ހަފްތާއަކަށް ބަންދުކޮށްލަފާނެއެވެ. އަނެއްކާވެސް ހަމަ ކުރިއެކޭ އެއްގޮތައް ހިންގަންފަށައެވެ. މިއީ ރަށުތެރޭގައި ކަންކަން ބޮއްސުންލާފައިވާ ގޮތުގުގެ މަދު މިސާލު ކޮޅެކެވެ
ދެންއޮތީ ކަސްރަތުކޮށްލަން ދެވެސް އޮތް މަދު ތަންތަނުން އެއް ތަނެވެ. މާލޭގެ ފަތާ ޓްރެކެވެ. ސްކޫލް ކުދިން ފަތަން ދަސްކުރާ އެކި ޕްރޮގްރާމްތައްވެސް ހިންގަނީ ހަމަ މިތަނުގައެވެ. އޮއިވަރާއެކު ކުނި ކޮތަޅުތަކުން ކުނި އައިސް ތަނުގެ ނަޖިސްކޮށްލައެވެ. ކައިރީގައި އަޅާފައިވާ ކަނޑުއުނޅަދު ތަކުން ފައިބާ ތެލުގެ އަސަރު ހުރެއެވެ. އަދި މިހާރަކަށް އައިސް އިންސާނުންގެ ނަޖިހުގެ އަސަރުވެސް މުޅިތާގައި ހުރެއެވެ. ނަމަވެސް މިކަމަށް ފިޔަވަޅު އަޅާނެ ބަޔަކު ނެތެވެ. ނަޖިހުގެ އަސަރު ކުރަނީ ކިހިނެތް ކީއްވެތޯ ދިރާސާކުރާނެ ބަޔަކުވެސް ނެތެވެ. އަޅުނޑުމެނާއި ވާހަކަދެއްކި ބައެއް ޑޮކްޓަރުން ފާހަގަކުރައްވާ ގޮތުގައި މިފަހުން މާލެތެރޭގައި އާންމުވަމުން މިދާ ބޭރަށް ހިންގާ ބަލީގެ ފެށުމަކަށްވެސް މިތަން ވެދާނެއެވެ. ފުރަތަމަ ބަލި ފެންނަން ފެށިކަން ފާހަގަވެފައިވަނީ އެތަނަށް ފަތަން ދިޔަ ކުޑަކުދިންގެ ފަރާތުން ކަމަށް އެ ޑޮކްޓަރުން ފާހަގަކުރިއެވެ. ނަމަވެސް މިކަމަށްވެސް ދިރާސާއެއް ކޮށްލާނެ ބަޔަކުނެތެވެ
ދިވެހިރާއްޖޭގެ ސިއްހީ ދާއިރާ ވަނީ ހަމަ ރަނގަޅަށްވެސް ބޮއްސުންލާފައެވެ. ގައިންގަޔަށް އަރާ ބަލިތައް އެހާ ގިނައިރު، ގައިންގަޔަށް ނާރާ ބޮޑެތި ބަލިތައްވެސް އަންނަނީ އިންތިހާއަށް އިތުރުވަމުންނެވެ. ޒުވާން އުމުރުގައި، ކަށީގައި ވަރުހުންނަން ޖެހޭ އުމުރުގައިވެސް، އުޅެނީ ކޮންމެވެސް ބައްޔަކާއި ހެދި ބޭސްކޮށްލަކޮށްލަ އެވެ. އަތުން ބޮޑު ޚަރަދެއް އެކަމަށް ހިނގައެވެ. ކުއްލި މަރުތައްވެސް އަންނަނީ އިތުރުވަމުންނެވެ
