ރަހްމަތްތެރިއަކާއި ސުވާލު ކޮށްލީމެވެ. ތިދާއިރާގެ މަޖްލިސް މެމްބަރު ކޮބައިތޯއެވެ. މަޖިލިސް ތަޅުމުގައި އަޑެއް ބަޑެއް ނީވެއެވެ. ބިލަކާއި ބަހުސްކޮށްލާ ހިޔާލު ހުށަހަޅާތަނެއް ނުފެނެއެވެ. ޖަވާބުގައި ރަހްމަތްތެރިޔާ ބުންޔެވެ. އާއެކެވެ. އޭނާ މަޖިލީހުގައި ހަމަ ޗުއްޕުވެސް ނުބުނާނެއެވެ. ނަމަވެސް ދާއިރާ ބައެއް ގޭގޭގެ ކަރަންޓް ބިލް ދައްކާލުން ކަހަލަ ކުދި ކުދި އެހީވާތީ އަނެއްހެން ވަރަށް ބަރާބަރެވެ. މިވާހަކަ ކޮޅުން އަޅުގަނޑަށް ދޭހަވި ވަރަށް ބައިވަރު ކަންކަން އެބަހުއްޓެވެ. އޭގެ ތެރެއިން ބައެއް ކަންކަން ހިއްސާކޮށްލާނަމެވެ
ދިވަހިން ރިޔާސީ ނިޒާމަކާއި ބަރުލަމާނީ ނިޒާމަކާއި ދެމެދު ވޯޓެއް ނެގީ ދެ ނިޒާމާއި މެދުވެސް އަދި ސިޔާސީ ކަންކަމާއި މެދުވެސް މާބޮޑަށް ލޯހުޅުވިފައިވާ ވަގުތެއްގައެއް ނޫނެވެ. ގިނަ ސިޔާސީ ޕާޓީތަކެއް އެކުލެވޭ ދިމަކުރާތީ ނިޒާމެއް ރާއްޖޭގެ ދޮންވެލި ގޮޑޫދޮށަށް ބީއްސާލިތާ އާކޮޅުގައެވެ. ފަހަރުގައި އަލުން އެފަދަ ވޯޓެއް ނަގަން ދެއްކިދާނެ އެންމެ ބޮޑު އުޒުރަކީވެސް މިއީ ކަމުގައި ވެދާނެއެވެ. ނަމަވެސް ލިޔުން ފަށަމުން ހިއްސާކޮށްލި ވާހަކަ ކޮޅުން ދޭހަވަނީ ދިވެހިން އަދިވެސް ސިޔާސީ އެކި ކަންކަމަށް ލޯ ނުހުޅުވޭކަމެވެ. މަޖިލިސް މެމްބަރަކު ރިޔާސީ ނިޒާމެއްގައި ކުރަން ޖެހޭނީ ކޮން ކަމެއް ކަމެއް އަދި ބަރުލަމާނީ ނިޒާމެއްގައި ކުރާނީ ކޮން ކަމެއްކަން ރަނގަޅަށް އެގިފައިނުވާކަމެވެ. ވޯޓަކަށް ދިއުމުގެ ކުރިން ހަޤީޤަތުގައި ނިޒާމުތަކާއި ގުޅޭ ހޭލުންތެރިކަމުގެ ޕްރޮގްރާމްތަކެއް ހިންގުން މާ މުހިންމެވެ
ބާރުތައް ވަކިވެފައިވާ ރިޔާސީ ނިޒާމެއްގައި މަޖިލީހަށް މެމްބަރުން ހޮވަނީ ރައްޔިތުން ތަމްސީލުކުރާށެވެ. ރައްޔިތުންގެ ނަމުގައި ރައްޔިތުންގެ މަސްލަހަތު ހިމެނޭ ބިލްތަކަށް ބަހުސްކޮށް ހިޔާލު ހުށަހަޅާ ދާއިރާގެ ރައްޔިތުން އެދޭ ގޮތަށް އަފަދަ ބިލްތަކަށް ވޯޓުދީ ފާސްކުރުމަށަވެ. އެކި އެކި މައްސަލަތައް ރައްޔިތުންގެ ހައްޤުގައި ދިރާސާކޮށް ޤާނޫނާއި ގަވައިދުގެ ތެރެއިން އެފަދަ މައްސަލަތަކަށް ހައްލު ހޯދައިދޭށެވެ. އެއްވެސް ހާލެއްގައި ރަށުގެ ކަރަންޓު ބިލު ދައްކައިދޭކަށް ނޫނެވެ. އެހާ ހޮޔޮއެދޭނަމަ އެކަން މަޖިލިސް ގޮޑީގައި ނީނަސް ކުރެވިދާނެއެވެ. ދާއިރާއަށް ހޮޔޮ އެދޭނަމަ ރައްޔިތުންގެ ހައްޤުގައި އަގަ ހުޅުވާލާނެ މީހަކު ގޮޑިއަށް އަރަން ޖާގަ ދިނުން މާ ރަނގަޅުވާނެއެވެ
ރާއްޖޭގެ ވެރިކަމުގެ ނިޒާމު އަދި ޅަފަތުގައި ވާތީ އޭގެ އެންމެ ފުރިހަމަ މާނައިގައި ރިޔާސީ ނިޒާމެއްގެ ކުލަވަރު ނުޖެހެއެވެ. ހަޤީގަތުގައި ރިޔާސީ ނިޒާމެއްގައި ޕާޓީތަކުން ދައްކާހާ މެމްބަރެެއްގެ ބަދަލުގައި ރައްޔިތުން އެދޭ ކެންޑިޑޭޓެއް ހޮވުމުގެ ފުރުސަތު ބޮޑުވެގެން ދެއެވެ. ބަރުލަމާނީ ނިޒާމެއްގައި ވަރިކަން ދެމިއޮތުމަށް މަޖިލީހުގެ މެޖޯރިޓީ ބޭނުންވެއެވެ. އަދި ބޮޑުވަޒީރު މަގާމުގައި ދެމިހުރުމަށް ކޮންމެހެންވެސް މަޖިލީހުގެ މެޖޯރިޓީގެ ތާއީދު ބޭނުންވެއެވެ. ކަންމިހެން ހުރުމުން މަގާމުގެ ބޭނުމުގައި ސިޔާސީ ސާރިދޯޅު ބަލާނީ އޭނައަށް ވަފާތެރި މީހުން ރައްޔިތުންގެ ބޮލުގައި އެޅުވޭތޯއެވެ. ބަރުލަމާނީ ނިޒާމެއްގައި ސަރުކާރެއް ހިންގުމުގެ ކަންކަންވެސް ކުރަނީ މަޖިލީހުން ކަމުން ޤަނޫނު ހެދުމުގައި ސާމިލްވާން ބޭނުން ނުވާ މީހާވެސް ޖެހޭނީ ސަރުކާރު ހިންގުމުގައި ބައިވެރިވާން ބޭނުން ނަމަ މަޖިލީހަށް ހޮވޭށެވެ. އިސާހިތަކު ޤާނޫނު ހަދާ މަޖިލިސް ފުރިފައި އޮންނާނީ ޤާނޫނު ހަދަން ބޭނުންނުވާ ބައެއް ވަދެއެވެ. އަދުވެސް އޮތީ ދާދި މިފަދަ ގޮތަކަށޭ ބުނެވިދާނެއެވެ. ނަމަވެސް އެއީވެސް ރައްޔިތުންގެ މައްސަލަ ނޫންތޯއެވެ
ބަރުލަމާނީ ނިޒާމެއް އެންމެ ބޮޑަށް އިސްތިހާރުކުރަނީ ވަޒީރުން ހޮވުމުގެ ބާރު ރައްޔިތުންނަށް ލިބޭ ނިޒާމެއްގެ ގޮތުގައެވެ. ނަމަވެސް މަޖިލީހަށް ބަލާލުމުން މިއީ ރައްޔިތުންނާއި އަދި ހަވާލުކުރަން ހޮޔޮވާވަރުގެ ކަމެއް ނޫންކަން ދޭހަވެއެވެ. އެތާ ތިބޭ ބަޔަކަށް ކިތަންމެ ފާޑުކިޔަސް އެއީ ހަމަ ދާއިރާތަކުގެ މެޖޯރިޓީ ރައްޔިތުން އަންބާ ކިޔާފަ ގޮސް ތަޅުމަށް ވެއްދި މެމްބަރުންނެވެ. ހަޑޫ ކިލޯ އަކަށް، ފުޓުބޯޅަ ބޫޓަކަށް ނުވަތަ ސަތޭކަ ރުފިޔާގެ ނޫޓަކަށް ވޯޓު ވިއްކާލާފައި ވިޔަފާރި ވެރިން މަޖިލީހަށް ހޮވާފައި އެތާ ތިބީ ހުސް ވިޔަފާރި ވެރިންނޭ ގޮވާ ބައެއްގެ އަތްމައްޗައް ވަޒީރުން ހޮވަން ހަވާލުކުރީމައި ވާނީ ކިހިނަކުން ތޯއެވެ. ދުވަހަކު މަޖިލީހަށް ހާޒިރު ނުވިޔަސް، ވޯޓާއި ޖެހުނީމައި ނޫނީ ރައްޔިތުންގެ ހާލުވެސް ބަލާނުލާ އެއް މެމްބަރުން ތަކެއް ތަކުރާރުކޮށް މަޖިލީހަށް ހޮވާ ބައެއްގެ އައްމައްޗައް ވަޒީރުން ހޮވުމުގެ ބާރު ދިނުމުން ވާނީ ކިހިނަކުން ތޯއެވެ. ފަހަރުގައި ހިތައް އަރާފާނެއެވެ. ވަކި މިހާރު ހޮވާ ވަޒީރުން މާރަނގަޅީތޯއެވެ. ޖަވާބުގައި ދަންނަވަން އޮތީ މިހެނެވެ. ވަޒީރުގެ ނަން ފޮނުވަނީ ރައްޔިތުންގެ އަޤްލަބިައްޔަތުން ހޮވާފަ ހުންނަ ރައީސްއެވެ. ވަޒީރަށް ރުހުން ދެނީ ތިޔަ ރައްޔިތުން ތަމްސީލުކުރަން ހޮވި މެމްބަރުންނެވެ. ރަނގަޅު އޮއްޓަރު ހުރި މެމްބަރުންތަކެއް ރައްޔިތުން މިޖިލީހަށް ހޮވާނަމަ ތާކުން ތާކު ނުޖެހޭ މީހުންގެ ނަމަކަށް ވަޒީރުކަމަށް ރުހުމެއް ނުލިބުނީހެވެ. އެހެން ކަމުން ބާރުތައް ފެށިގެން އަންނަނީ ރައްޔިތުންގެ ކިބައިން ކަމުން، މައްސަލަތައްވެސް އަދި މައްސަލަތަކުގެ ހައްލުެސް އަންނަނީ ރައްޔިތުނާއި ހިސާބުން ކަމުގައި ދެނެގަންނަން އެބަ ޖެހެއެވެ
ބާރުތައް ވަކި ކުރެވިފައިވާ ނިޒާމުގެ ހުރިހާ ބާރެއް ގަސްތުގައި ބަޔަކު މަސްހުނިކޮށްލާ ބަރުލަމާނީ ނިޒާމެއް ސިފަ ޖައްސުވާފައި ރައްޔިތުން އެދެނީ ބަރުލަމާނީ ނިޒާމެކޭ ބުނުމަކީ ރަނގަޅުގޮތެއް ނޫނެވެ. ރައްޔިތުންނަށް ހެޔޮ އެދޭ ވެރިން ތަކެއް ނަމަ ރައްޔިތުން ހޭލުންތެރި ކުރުމުގެ މަސައްކަތް ކުރީހެވެ. ބަރަބޯ މަސްހުނި، ފަތް މަސްހުނި ފަދަ ތަފާތު މަސްހުނިތައް މީރަސް ދިމަކުރާތީ މަސްހުންޔަކީ ހިތި އެއްޗެކެވެ. މިއަދު މިފެންނަނީ މަޖިލީހުން ޤައުމުގެ ހުރިހާ ބާރަކަށް އަތް ބާނާތަނެއެވެ. ތިޔަ ރައްޔިތުން ހޮވި މެމްބަރުންނެވެ. ޖުޑިޝަރީގައިވެސް އިނީ މަޖިލިސް ރައީސްއެވެ. ޕާޓީގެ ރައީސް އަކީވެސް އެއީއެވެ. އަމިއްލަ ޕާޓީގެ އަސާސީ ޤަވައިދުގައި ކޮންމެ އެއްޗެއް ލިޔެވިފައި ވިޔަސް ހޮޔޮކަމަށެވެ. ކައުންސިލް އިންތިހާބުގައި މަގުމަތީ ޖަލްސާތަކުގައި “އަޅުގަނޑަށް” މާލޭގެ ކަންކަން ރަނގަޅުކުރަން އިގޭނޭ ކިޔާފައި ވާހަަކަދެއްކީ ވެސް ހަމަ މަޖިލިސް ރައީސެވެ. މާލެ ސިޓީ ކައުންސިލްގެ ރައީސް ކަމަށް އެބޭފުޅާ ޕާޓީއިން ކުރިމަތިލާފައި ހުރީ އެބޭފުޅާއެއް ނޫނެވެ. ދެން ކައުންސިލްގެ ޒިންމާތައް އެބޭފުޅާއަށް އުފުލޭނޭ ކިޔައިގެން ވާހަކަދެއްކީ ކީއްވެކަމެއް ނޭގެއެވެ. ވުޒާރާ ތަކަށްވެސް ބާރުފޯރުވަނީއެވެ. ޕީޖީއިން ފެށިގެން ގޮސް ކޯޓުތަކުގައި ވެސް ހަމަ އެބޭފުޅާގެ ދެފައެވެ
ރިޔާސީ ނިޒާމެއް ނަމެއްގައި އޮތެއް ކަމަކު ފެންނަމުން މިދަނީ ބަރުލަމާނީ ނިޒާމެއްގައި ކަން ހިގާނެ ގޮތެވެ. ހުރިހާ ބާރުތަކެއް ބޮޑުވަޒީރު ނަގާނެވެ. ރައީސުލް ޖުމްހޫރިއްޔާ ވާނީ ހުންނަ ބޮލަކަށެވެ. ނަމަވެސް ދެމީހުންނަށްވެސް ބޮޑު މުސާރައާއި އިނާއަތްތަށް ރައްޔިތުންގެ ޓެކްސް ފައިސާއިން ހިގާނެއެވެ. އިރު ކޮޅުކޮޅާ ކޯލިޝަންތައް ރޫޅި އައު ކޯލޝިންތައް ހެދޭނެއެވެ. މިގޮތުން މެޖޯރިޓީ ގެއްލޭނަމަ ދުވާލަކު އެއްފަހަރު އާ ސަރުކާރެއް އެކުލަވާލަފާނެވެ. ޕާޓީތެރޭގައިވެސް އޮންނާނީ ބޮޑު ދެގެރި ބޮޑުވަޒީރު ކަމާއި ހިފުމެވެ. ހުރިހާ ގެއްލުމެއް ކައްގަލެއްގެ ގޮތުގައި ތިބޭ ރައްޔިތުންނަށެވެ. އެހެނީ ޤައުމެއް ނުހިގާނެއެވެ. މިއަދުވެސް ދެކެމުން މިދަނީ އެފަދަ މަންޒަރުތައެއް ނޫންތޯއެވެ. އަދި މިއީ ނުރަސްމީ ބޮޑުވަޒީރަކާއި ދިމަކުރާތީ މަސްހުންޔެއް އޮތް އިރު ވާވަރެވެ
