ނުވަ މަސްދުވަހުގެ ގަދަވޭނުގައި މައި މީހާ އުފުލާ ބުރައަކީ ނުހަނު ލޯތްބާއި، ކެތްތެތިކަމާއި، ފޮނި އުއްމީދުތަކަކާއި ހުވަފެންތަކަކާއި އެކު އުފުލާ ވޭނެކެވެ. އައްޑޫ އިކުއިޓޯރިއަލް ހޮސްޕިޓަލަށް ވިހަން ދިޔަ ދެމަފިރިންވެސް ދިޔައީ ހަމަ ނުހަނު ފޮނި ހުވަފެންތަކަކާއި އެކުއެވެ. ބަނޑުބޮޑުއިރު ގަވައިދުން ސްކޭންތައް ހެދިކަމަށް ދެމަފިރިން ބުނެއެވެ. އެއްވެސް މައްސަލައެއް ނެތްކަމަށް ހުރިހާ ސްކޭނަކުންވެސް ދެއްކިއެވެ. ވަރަށް ވެސް އުފާވެރިއެވެ. ވިހަން ޑޮކްޓަރ އަންގާފައިވާ ދުވަހަށް ހޮސްޕިޓަލަށްވެސް ގެންދެވުނެވެ
ވިހަން ހޮސްޕިޓަލަށްގޮސް ވިހެއުން ލަސްވުމުން، ޑޮކްޓަރު އެންގެވީ ހަވީރު ވަންދެން ބެލުމަށެވެ. އަދި އެއަށްފަހުވެސް އިތުރަށް މަޑުކޮށްލުމަށް ޑޮކްޓަރު އިރުޝާދު ދެއްވިއެވެ. ދެމަފިރިންވެސް ޑޮކްޓަރުގެ އިރުޝާދަށް އިހްތިރާމް ކުރިއެވެ. ފޯމެއްގައި ސޮއިވެސް ކުރުވިއެވެ. ފޯމުގައި، ކުއްލިއަކަށް އޮޕަރޭޝަން ކުރަންޖެހިއްޖެ ހާލަތެއްގައި އޮޕަރޭޝަން ތިއޭޓަރ ތައްޔާރަށް ހުންނާނެކަމަށް އޮތެވެ. ކެތްތެރިވެގެން ތިއްބައި، ދަންވަރު 12 ޖަހާކަށްހާއިރު، ޑޮކްޓަރު އައިސް ދެންނެވީ އޮޕަރޭޝަން ކުރަން ވަންނަންވީ ކަމުގައެވެ. އޮޕަރޭޝަން ތިއޭޓަރާއި ހަމައަށް ދިޔައިރު އެތަން ހުރީ ތަޅުލާފައެވެ. އެއްވެސް މުވައްޒަފެއް ނެތެވެ. ޑޮކްޓަރުގެ މަސައްކަތުން، މުވައްޒަފުންނަށް ގުޅައިގެން ގެނެސް، އޮޕަރޭޝަން ތިއޭޓަރ ހުޅުވާ އޮޕަރޭޝަން ފެށޭވަރުވީ މެންދަމު 2 ޖަހަން އުޅެނިކޮށެވެ
މާތްﷲގެ ރަޙްމަތްފުޅުން، ދަރިފުޅު ސަލާމަތްވިއެވެ. ނަމަވެސް ވާހަކަދައްކަން ފެށުމުގައި އަދި ހިނގާ އުޅުމުގައި ލަސްކަމެއް އެބަހުއްޓެވެ. ބޭރު ޤައުމަކަށް ގޮސް ޓެސްޓްތައް ހެދޭތޯވެސް އުޅެފިއެވެ. އަދި ދަރިފުޅު މާ ކުޑަވީމަ މާ ބައިވަރު ޓެސްޓުތަކެއް ހެދޭކަށް ނެތެވެ. އާއިލާ ތިބީ ނުހަނު ބޮޑު ކަންބޮޑުވުމެއްގައެވެ. މައްސަލަ ޖެއްސުމުން ހޮސްޕިޓަލުން ބުނީ ސިޓީ އަކުން ރަސްމީކޮށް މައްސަލަ ހުށަހެޅުމަށެވެ. މިހާރު 2 އަހަރު ވެއްޖެއެވެ. އަދިވެސް ޖަވާބެއް ނުލިބެއެވެ. ވަޒީފާގެ ގޮތުން ކުއްޖާގެ ބައްޕައަށް ފާޅުގައި މީސްމީޑިއާގައި އަޑުއުފުލާ ނުހެދެއެވެ. ވަޒީފާއިން ވަކިކޮށްފިނަމަ އެއީ އާއިލާ އަށް މިވަގުތު ލިބޭނެ އިތުރު ހިތްދަތިކަމެކެވެ. އަޅުގަނޑުމެންގެ ބޭނުމަކީ މިފަދަ އާއިލާތަކުގެ އަޑުވެސް ކަމާ ބެހޭ ފަރާތްތަކުގެ ކަންފަތާއި ހަމައަށް ގެންގޮސް ދިނުމެވެ
