ފަސް އަހަރުގެ ދައުރެއް ވެރިޔަކު ފުރިހަމަކޮށްފިއެވެ. ސަރުކާރު ޒިންމާދާރު ކުރުވުމުގެ ޒިންމާ އަދާކުރުމުގައި އިދިކޮޅު ޕާޓީ ދެމި އޮތެވެ. ކުރިން ފިޔާތޮށި ސަރުކާރުން ބައި އެޅި ކުދި ޕާޓީތައް ތިބީ ރީދޫ ޕާޓީއިން ބައި އަޅައިގެންނެވެ. ފިޔާތޮށި ސަރުކާރުން ކުރި ހުރިހާ މޮޅުކަމެއްގެ މެޑަލް އެމީހުން ޖަހައެވެ. ފިޔާތޮށި ސަރުކާރުން ކުރި އެއްވެސް ނުކިއްސަރުކަމެއް އެމީހުންނާއި ގުޅޭ ކަމަކަށް ނުވެއެވެ. ރީދޫ ސަރުކާރުގައިވެސް ހަމަ އެހެންނެވެ. ބައި އަޅައިގެން ތިބީ އެއްވެސް ފަލްސަފާއެއްގެ މަތީގައި ތިބި ބައެއް ނޫނެވެ. ބޮޑު ދެ ޕާޓީގެ ވެރިކަމުގައި، އެ ދެ ޕާޓީއަށް އެ ދެ ޕާޓީގެ ފަލްސަފާ އަދި މެނިފެސްޓޯ ފުރިހަމައަށް ތަންފީޒުވިޔަކަވެސް ނުދިނެވެ. ބަނޑު ފުރެންދެން ކާލައިގެން ފަހުގަނޑީގައި ސަރުކާރު ގޯސްވެގެން ކުދި ކިޔަން ފަށައެވެ. ނަމަވެސް މަޤާމުތައް ދޫނުކުރެއެވެ. ވޯޓަށް ދޮޅުގަނޑިއިރަށް ވުމުން ކޮޅު ބަދަލުކޮށްލައިފިއެވެ. އަނެއްކާވެސް ހީހޫތަނުން ކާށެވެ.
ވޭތުވި ފަސް އަހަރު އިދިކޮޅު ޕާޓީގެ ގޮތުގައި ތިބި ބަޔަކު އެތައް ޤުރުބާނީއެއް ވެއްޖެއެވެ. ޕާޓީގެ ވެރިކަން ނިމުމުން، މަޤާމަށްޓަކައި ތިބި އެތައް ބަޔަކު ޕާޓީ ދޫކޮށް ދިޔައެވެ. ޕާޓީ ނިކަމެތިވިއެވެ. ފަސް ކެނާ ނުކުމެ ޕާޓީ އޮފީސް ދޮރުމަތީ ހިޔާލު ފާޅުކޮށް އިދިކޮޅު ޕާޓީގެ ޒިންމާ އާއިގެން ކުރިއަށް ދިޔައެވެ. މިހާލަތުގައި މަޖިލީހުންވެސް ލިބުނީ މަދު ގޮނޑިކޮޅެކެވެ. ބޮޑު އަޤްލަބިއްޔަތު އޮތް ވެރިކަން ކުރާ ޕާޓީ އާއި ދެކޮޅަށް ހައެއްކަ މެމްބަރުން މަސައްކަތް ކުރަމުން ދިޔައިރު، އެހެން ހުރިހާ ޕާޓީއަކާއި ދެކޮޅަށް މަގުމަތީގައި ތިބީ އިދިކޮޅު ޕާޓީގެ ފަސް ކެނައެވެ. ނަމަވެސް ހިތްވަރު ގަދަ ކެނާ ތަކެކެވެ. އެތައް މަހެއްގެ ބުރަ މަސައްކަތާއި އެކު، ކައުންސިލް އިންތިހާބުގައި ބޮޑު ނަތީއެއް ދެއްކިއެވެ. ވެރިކަމުގައި ތިބި ބަޔަކަށް ކަންކަން މިދަނީ އަދި ރަނގަޅަށް ނޫންކަން ރޭކާލާން ފެށިއެވެ. ނަމަވެސް އެއިރު ހަޤީޤަތުގައި ލަސްވެއްޖެއެވެ. ފިޔާތޮށި ލަސްކަރު ދިޔައީ ދުވަހެއް ދުވަހަކަށް ގަދަވަމުންނެވެ. ރިޔާސީ އިންތިހާބާއި ޖެހުންއިރު ހަޤީޤަތުގައި އޭގެ ފަސް އަހަރު ކުރިން އޮތް ނިކަމެތި ހާލު ހަދާންވެސް ނެތޭހާ ގަދަކޮށެވެ. އެއްކަލަ ކުދި ޕާޓީތައް ތިބީ ހީހޫތަނުން ކާލައިގެން ކުޅި ބަލާށެވެ. އެމީހުންނަށްވެސް ފެންނަން އޮތީ ސަރުކާރާއި މެދު ރައްޔިތުން ހިތްހަމަ ނުޖެހޭކަމެވެ. ބޭނުންވީ އަމިއްލައަށް ނުކުމެ މޮޅުވާން ނުވަތަ ދެން އަންނަ ސަރުކާރެއްގެ ބޮޑު ބައި ނެގޭތޯ ރިޔާސީ އިންތިހާބުގައި ވަކިން ވާދަކުރާށެވެ.
ފިޔާތޮށި ޕާޓީ ވިޔަސް ރީދޫ ޕާޓީވިޔަސް، އެ ޕާޓީތަކަށްޓަކައި ޤުރުބާންވާ އާންމު މެމްބަރުން، ޤުރުބާން ވަނީ އެ ޕާޓީތަކުގެ ފަލްސަފާއަށް ކުރާ އިތުބާރެއްގެ ބޮޑުކަމުންނެވެ. އެ ޕާޓީ ވެރިކަމަށް އައިސް އެ ފަލްސަފާއާއި އެކު ރައްޔިތުނަނަށް ގިނަގުނަ ޚިދުމަތްތަކެއް ކޮށްދެވިދާނެކަމަށް ޤަބޫލުކުރެވޭތީއެވެ. ބައި އަޅަން މި އަންނަ ކުދި ޕާޓީތަކަކީ ބޮޑު ދެޕާޓީ ފަދައިން އެއްވެސް ފަލްސަފާއެއްގައި ތިބި ބައެއް ނޫނެވެ. ނަމަވެސް ވުޒާރާތަކުން ބައި އަޅައި މެނިފެސްޓޯ ތަންފީޒުކުރުމުގެ ބައެއް މި ހަވާލުކުރެވެނީ މިމީހުންނާއެވެ. އެ ޒިންމާ އެމީހުން އަދައެއް ނުކުރެއެވެ. ސަބަބަކީ އެމީހުން އައީ ހަމައެކަނި މަޤާމަށެވެ. އޮތީ އެމީހުންގެ ޕާޓީގެ ވެރިކަމެއް ނޫނެވެ. ވެރިކަމުގައި އޮތް ޕާޓީގެ ވެރިކަން ފުޑުނަސް އެމީހުންގެ ފަރުވާލެއް ނެތެވެ. އަނެއްކާވެސް އަނެއް އޮޑިއަށް ފުންމާލާނީއެވެ. އަނެއްކާވެސް އިދިކޮޅު ޕާޓީގެ ގޮތުގައި އޮންނަ ދުވަހު، ރީދޫ ވިޔަސް ފިޔާތޮށިވިޔަސް، ޕާޓީ ނަގައި ކޮޅަށްޖަހައިދެނީ ޕާޓީ ދެކެ ލޯބިވާ އާންމު މެމްބަރުންނެވެ. ވެރިކަން ލިބެން ގާތްވީމައި، އާންމު މެމްބަރުން ނުރުހުނަސް ވެރިން ޑީލް ހަދާލާފައި އެއްކަލަ ސިޔާސީ ކުނި ބުނި އެއްކޮށް ބޮޑެތި މަޤާމުތަށް ބަހާލަނީއެވެ. މި ސިޔާސީ ކުނި، މިފަދަ ޑީލް ހަދަން ވެސް މޮޅީއެވެ. މިއަށް ކިޔަނީ ވައިކުޑައިގައި ފޭބުމުގެ ހުނަރެވެ.
