މި އަހަރުގެ ފުރަތަމަ ދައުރުގެ ފުރަތަމަ ޖަލްސާ ބޭއްވުނީ 5 ފެބްރުއަރީގައެވެ. މިހާތަނަށް ބާއްވާފައި ވަނީ އެންމެ 5 ޖަލްސާއެވެ. މެއި މަހު 15 ވަނަ ދުވަހު، މި އަހަރުގެ ފުރަތަމަ ދައުރު ހަަމަވެ އަނެއްކާވެސް މެމްބަރުން ދާނީ މަސް ދުވަހުގެ ޗުއްޓީއަކަށެވެ. މަޖިލީހުގެ ޤަވާއިދުގައިވާ ގޮތުން ދައުރުގެ ތެރޭގައި ބާއްވަން ޖެހެނީ ހަފްތާއަކު މަދުވެގެން ތިން ޖަލްސާއެވެ. މިވަރުވެސް ކޮށްނުލެވި މަހަކަށްވުރެ ގިނަ ދުވަސް ވެއްޖެއެވެ.

މެދުއިރުމަތީގައި ފެށިގެން އުޅޭ ހަނގުރާމަ އާއި ގުޅިގެން ދުނިޔޭގެ އިޤްތިސާދަށް މިއައި ހީނަރުކަން އައުމުގެ ކުރިންވެސް ރާއްޖޭގެ އިޤްތިސާދު އޮތީ ހަރަދު ކުޑަކުރަން ޖެހިފައެވެ. ރައްޔިތުންގެ މަޖިލީހަށް ދައުލަތުން ކުރަންޖެހެނީ އިސްރާފު ބޮޑު ހޭދައެއް ކަމުގައި އޭރުވެސް އަދި އަމުދުން މިއަދުވެސް ރައްޔތިުން ޤަބޫލުކުރެއެވެ. އޭގެ ހެއްކަކީ، ރައްޔިތުންގެ މަޖިލީހުގެ މެމްބަރުންގެ މުސާރަ ކުޑަކޮށް، ކޮމިޓީ އެލަވަންސް ކަނޑާލާ، ލިބޭ އަގުބޮޑު ހެލްތް އިންޝުއަރެންސް އާސަންދައަށް ބަދަލު ކުރުމަށް ގޮވާލާ އަޅުގަނޑު ފެށި ޕެޓިޝަނަށް 2000 އަށް ވުރެ ގިނަ ސޮއި ލިބިގެން ދިޔުމެވެ. ނަމަވެސް އެންމެ މަޖިލިސް މެމްބަރަކު ވެސް އެ ޕެޓިޝަން މަޖިލިސް ތަޅުމަކަށް ނުވެއްދިއެވެ.

ދާދި އިހަކަށް ދުވަހު ޕްރައިވެޓައިޒޭޝަން އެންޑް ކޯޕޮރައިޒޭޝަން ބޯޑުން މިވަނީ ހަރަދު ކުޑަކުރުމުގެ ގޮތުން ކުންފުނިތަކުގެ މުވައްޒަފުންނާއި ގުޅޭ ފިޔަވަޅުތަކެއް އެޅުމަށް އަންގާ އިއުލާނު ކޮށްފައެވެ. މި ބޯޑުގައި މަޖިލީހުގެ އެސްއޯއީ (ސަރުކާރު ހިއްސާވާ ކުންފުނިތަކާއި ގުޅޭ) ކޮމެޓީގެ މެމްބަރުން ތިއްބަވައެވެ. މި ބޭފުޅުންނަށް މި ބޭފުޅުންގެ އަމިއްލަ މުސާރަ ކުޑަކޮށް ހަރަދު ކުޑަކުރުމުގެ ބަދަލުގައި ފެނުނީ ނިކަމެތި ރައްޔިތުންގެ މުސާރައެވެ. މަސައްކަތެއް ނުކޮށް ކާޑު ޖަހާލާފައި ގެއަށް ދާގޮތަށް ސިޔާސީ ގޮތުން އެތައް ބަޔަކަށް ކުންފުނިތައް މެދުވެރިކޮށް މުސާރަ ދެއެވެ. މި މީހުންނަށް ލިބޭނެ ގެއްލުމެއް ނެތެވެ. ހަރަދު ކުޑަކުރުމަށް މި މީހުން ވަޒީފާއިން ކެނޑުމެއްވެސް ނެތެވެ. މަޤާމުގެ ކުރިއެރުމެއްވެސް ނުލިބޭ ގޮތަށް މި ދަތިކުރަނީ މަސައްކަތް ކުރަންތިބި މުވައްޒަފުންނަށެވެ. ރައްޔިތުންވެސް އެބަ ވިސްނަން ޖެހެއެވެ. ވޯޓު ވިއްކައިގެން ކުފޫ ހަމަނުވާ މީހުން ޤާނޫނު ހަދަން ހޮވީ މަސައްކަތެއްނުކޮށް މުސާރަ ނަގަންހެއްޔެވެ؟ ނޫނީ ސަރުކާރަށް ކެމްޕެއިން ކޮށްދޭން ހެއްޔެވެ؟ ރައްޔިތުން ބޭނުންވާ ގޮތަކީ މިއީ ހެއްޔެވެ؟