ހަނގުރާމައިގެ ކަޅު ވިލާތައް ދުނިޔެ ވަށައިލުމުގެ ކުރިންވެސް ދިވެހިރާއްޖޭ އޮތީ އިޤްތިސާދީ ގޮތުން ނާޒުކު ހާލަތެއްގައެވެ. ދައްކަން ޖެހިފައި ހުރި ލޯނުތަކާއި، ގައިން ޑްރޯން ތަކާއި، ކުރި ބޭކާރު ހަރަދު ތަކާއި، ބަހާލި ވަޒީފާތައް ދިޔައީ މި ހާލަތަށް ދަރު އަޅަމުންނެވެ. ފަރުވާލެއް ނެތެވެ. ލިބޭ ބަޔަކު ލިބޭހާ ހިނދަކު، ހުރިހާ ކަމެއް ވަރިހަމަ ވެގެންނެވެ. ޤައުމަކާއި ޤައުމެކެވެ. އެކީ އިނދަ ޖެހުނީމައި، ފަހުން އެންމެންނަށް ލިބޭނެ ގެއްލުމެއްވެސް ވަރިހަމަ ވެފައެވެ.

މިހެން ތިއްބައި ޤައުމުގެ ހާލަތަށް ރިޢާއަށްކޮށް، ރައީސް އޮފީހުގެ ވަޒީރަކު ރައްޔިތުންނަށް ނަސޭހަތްތެރިވީ ރައްޔިތުން ގަރުދިޔަ އާއި ބަތަށް ތިރިވެލުމަށެވެ. އަނެއްކޮޅުން މަޖިލީހުގެ ނައިބު ދެއްވީ އާސަންދަ ކަނޑާލަން ޖެހިދާނެ ކަމުގެ އިންޒާރެވެ. ސަރުކާރުގެ ހަރަދުތައް ދެކޮޅު ނުޖެހިގެން އުޅެނީ ރައްޔިތުންނާއި ހެދިއޭ ހީވާ ކަހަލައެވެ. މި ހާލަތުގައި އަޅުގަނޑު އިސްވެ ރައްޔިތުންގެ މަޖިލީހުގެ މެމްބަރުންގެ މުސާރަ ކުޑަކޮށް، ދޭ އަގު ބޮޑު ހެލްތް އިންސިއުރެންސްގެ ބަދަލުގައި އާސަންދަ ހަމަޖައްސާ، ކޮމެޓީ އެލަވަންސް ކަނޑާލާ، މެމްބަރު ކަމުން ވަކިވުމުން ދޭ އިނާޔަތް ކަނޑާލަން ގޮވާލާ ޕެޓިޝަން ފެށީމެވެ. ދެ ހާހަށްވުރެ ގިނަ ރައްޔިތުން ސޮއި ކުރި ޕޭޓިޝަން މަޖިލީހުގެ ތަޅުމަށް ވައްދައިދޭނެ އެންމެ މެމްބަރެއްވެސް ނުވިއެވެ. ރައްޔިތުން ހޮވާފައި ތިބި މީހުން ފީކަޅައީއެވެ. ހަނގުރާމައިގެ އަސަރު މިއައީ މި ހުރިހާ ކަމެއްގެ ތެރޭގައި އުޅެނިކޮށެވެ.

ދުނިޔޭގެ އެހެން ޤައުމުތަކުގައި ހަރަދު ކުޑަކުރަން ދުރާލާ ފިޔަވަޅު އަޅަން ފަށައިފިތާ އެތައް ދުވަހެކެވެ. އެހެން ޤައުމުތަކުގައި ޕެޓްރޯލަށް ކުރާ ހަރަދު ކުޑަކުރަން ފިޔަވަޅު އަޅާއިރު ރާއްޖޭގައި ބާއްވަނީ ސައިކަލު ބުރެވެ. ކަރަންޓް ހަރަދު ކުޑަކުރަން ފަޔަވަޅުތައް އަޅާއިރު، ރާއްޖޭގައި ދިއްލަނީ ކުލަކުލައިގެ ބޮކިތަކެވެ. އެ ޤައުމުތަކުގެ ބޮޑުވަޒީރުންނާއި ލީޑަރުން ޤައުމީ ޓީވީގައި ހަރަދު ކުޑަކުރަން ނަސޭހަތްތެރިވާ އިރު މި ޤައުމުގެ ވެރިން އުޅެނީ ދެ އިންތިހާބު އެއް ނުކުރެވިގެނެވެ. ރާއްޖެއަށް އެއްވެސް އަސަރެއް ނުކުރާ ކަމަށް ދެއްކެން އުޅުނަސް، ތެލުގެ އަގު ބޮޑުވެއްޖެއެވެ. އެއާއި އެކު މުދަލުގެ އަގު އުފުލެން ފަށައިފިއެވެ. ފަހަރުގައި ގޭހާއި ތެޔޮ އެކީ ހުސްނުވެދާނެއެވެ. ނަމަވެސް އެންމެ ބޮޑު ކާރިސާ އަކީ މުދަލުގެ އަގުން އުފުލޭ ކޮންމެ 1ރ އަކީ ވެސް ނިކަމެތި އާއިލާތަކަށް ބޮޑު އެއްޗެއްކަން ނުވިސްނޭ ވެރިން ތިބުމެވެ.

މި ހާލަތުގައި އިންތިހާބު ނިމޭ ގޮތަށް ހަރަދު ކުޑަކުރަން ފިޔަވަޅު އަޅާނެކަން ކަށަވަރެވެ. ރައްޔިތު މީހާ އަށް ގަރުދިޔަ އާއި ބަތާ ކާން މަޖުބޫރު ކުރުވާނެ ފިޔަވަޅުތަކެވެ. ވެރިން އުޅޭނީ ހަމަޖެހިގެނެވެ. އެމީހުން ތިބީ ފުދިގެނެވެ. ހަރަދު ކުޑަކުރަންވެސް މަޖިލިސް މެމްބަރުންނާއި ސިޔާސީންނަށް މިކުރާ ހަރަދު ކުޑަކުރުމުގެ ވިސްނުމެއް ނެތެވެ. އަދި ނުވިތާކަށް ސިޔާސީ މަޤާމުތައް އަދިވެސް އުފައްދަނީއެވެ. ކުރިމަތިލާން ޖެހޭ ހަޤީގަތަކީ ރައްޔިތުންގެ ޒިންމާވެސް މިކަމުގައި އޮތްކަމެވެ. ބޭނުމީ ތައުލީމީ ޒިންމާދާރު މެމްބަރުންނޭ ގޮވާފައި، ވޯޓު ވިއްކައިގެން ރަށުގައި އުޅޭ އެންމެ ތާކުންތާކު ނުޖެހޭ މީހުން ހޮވަނީ ރައްޔިތުންނެވެ. ސަރުކާރު ހަރަދު ކުރާގޮތް ބަލާ ޒިންމާދާރު ކުރުވީ މަޖިލިސް މެމްބަރުންގެ ޒިންމާއެކެވެ. މެމްބަރުންނަކީ އަމިއްލައަށް މުސާރަ ކަނޑައަޅާ ބައެއްކަމުން، ޤައުމުގެ އިޤްތިސާދީ ހާލަތަށް ބަލާ މުސާރަ ކުޑަކުރުމުގެ ބާރުވެސް އޮތީ މެމްބަރުންގެ އަތްމަތީގައެވެ. ނަމަވެސް ރައްޔިތުން ހޮވާފައި ތިބި މެމްބަރުންގެ އެ ފެންވަރެއް ނެތެވެ.