ކަރުދާހުގައި ދިވެހިރާއްޖެއަކީ ފަގީރު ޤައުމެއް ނޫނެވެ. ބޮލަކަށް ޖެހޭ ޖީ.ޑީ.ޕީ އުޅެނީ ސަތޭކަ ހަތްދިހަ ހާސް ރުފިޔާއަށްވުރެ މަތީގައެވެ. ސަރަހައްދުގެ އެހެން ޤައުމުތަކާއި އަޅާކިޔާއިރުވެސް ނިސްބަތުން ރަނގަޅެވެ. ނަމަވެސް ގޭބިސީތަކުގެ އާމްދަނީ އަށް ބަލާއިރު އަދިވެސް ބޮޑުއިންސަތައަށް މަހެއްގެ މައްޗަށް ލިބެނީ ގާތްގަނޑަކަށް 28ހާސް ރުފިޔާއެވެ. ގޭބިސީ އެއްގެ ހަރަދަށް ބަލާއިރުވެސް އުޅެނީ މިވަރުގައި ކަމުން، އާދައިގެ އާއިލާއެއްގެ އަތުގައި ފަހަށް ރައްކާކުރާނެ މާބޮޑު އެއްޗެއް ނޯއްނާނެކަން ދޭހަވެއެވެ. އެވެރެޖް ގޮތެއްގައި ބޮަލަކަށް ޖެހޭ އާމްދަނީ އުޅެނީ 11 ހާހާއި 14 ހާހާއި ދެމެދެވެ. އެކި ސަބަބުތަކާއި ހެދި، ރުފިޔާގެ އަގު ވެއްޓި، ލިބޭ އާމްދަނީ އިން ގަނެވޭ ތަކެތި ދަނީ މަދުވަމުންނެވެ. އެހެން ގޮތަކަށް ބުނަނީނަމަ ލިބޭ އެއްޗަކުން ދެކޮޅު ޖައްސާލަން މެދު ފަންތީގެ އާއިލާތަކަށް ދަނީ ދަތިވަމުންނެވެ.
ފަތުރުވެރިކަމަކީ ރަން ބިސް އަޅާ ކުކުޅެވެ. އެ ސިނާއަތުގައި އަދިވެސް އެނދު ދަނީ އިތުރުކުރެވެމުންނެވެ. އެކި ޓެކްސްތަކުގެ ޒަރިއްޔާއިން ސަރުކާރަށް ފައިސާ ލިބެއެވެ. އަދި ނުވިތާކަށް ދާދި ފަހުން ސަރުކާރުން ވަނީ ރިސޯޓުތަކުގެ ކަރުގައި ހިފައި ޑޮލަރުން އިންސައްތައެއް މީރާއަށް މާރުކުރަން މަޖުބޫރު ކުރުވާފައެވެ. ނަމަވެސް މިއިން ކަމަކުން އާންމު މީހާއަށް ވީ ފައިދާއެއް ނެތެވެ. ބޭސްފަރުވާ އަށް ދާމީހާ ޑޮލަރަށް ސަލާން ޖަހަނީއެވެ. ކުދި ވިޔަފާރިތަކުން ޑޮލަރަށް ސަލާން ޖަހަނީއެވެ. ބޭރުގައި ކިޔަވާ ދަރިވަރުންނަށް ފައިސާ ފޮނުވަން ބެލެނިވެރިންވެސް ޑޮލަރަށް ސަލާން ޖަހަނީއެވެ. ހާލަތު މިހެން އޮތްވާ ރަސްމީ ބޭންކަށް ޑޮލަރު ދެކޮޅު ނުޖެއްސި، މުޅި އާބާދީއަށް ޑޮލަރު ލިމިޓެއް ޖަހަފިއެވެ.
މިވީ ގޮތުން ސަބްސްކްރިޕްޝަނަކަށް ފައިސާ ދައްކަންވެސް ޖެހެނީ ބޭންކަށް ގުޅައިގެން އާދޭސް ކުރާށެވެ. ޓެމޫއިން އެއްޗެެެއް ގަންނަން ބަލާއިރު ދުވަހުގެ ލިމިޓް އޮންނަނީ ހަމަވެފައެވެ. އޮފީހުގެ މަސައްކަތްތަކަށް ބޭނުންވާ ސޮފްޓްވެއަރ އަށް ކާޑަކުން ނުކެނޑެއެވެ. ހަޤީޤަތުގައި ދިވެހިންނަކީ ބޭންކާއި ސަރުކާރުގައި ސަލާންޖަހަން ޖެހޭ ވަރަށް ވުރެ މާ ޤަދަރުވެރި ދިރިއުޅުމެއް އުޅެވޭނެ ފެންވަރުގެ ޤައުމެއްގެ ރައްޔިތުންނެވެ. ހުރިހާވެސް ނިކަމެތިކަމެއްގެ އަސްލަކީ ސިޔާސީން ހާވާފައި ދާ ހަޑިއެވެ. އެވަރުންވެސް އިޤްތިސާދުގެ ހާލަތަށް ބަލައި ސިޔާސީންގެ މުސާރަ ކުޑަކުރުމެއް ނެތެވެ. އަދިވެސް އުޅެނީ އެކި މަޤާމުތަކުގެ މުސާރަ ބޮޑު ނުކުރެވިގެންނެވެ. ގޭބިސީތަކަށް ވަންނަ އާމްދަނީ އިތުރު ކުރެވޭނެ މަގު ކޮށައިދޭނެ ސިޔާސީއެއް ނެތްފަދައެވެ. ބޭނުންވަނީ ރައްޔިތުން ހާލުގައި ބައިތިއްބައިގެން، ރިޝްވަތުން ވޯޓު ގަނެ ބާރުތައް އެއްކުރެވޭނެ ގޮތެއް ހޯދާށެވެ.
ރަނގަޅެވެ. ބޭރުގެ ލޯނުތައް ދައްކަން ޑޮލަރު ބޭނުންވާނެ ކަން ދަންނަމުއެވެ. ނަމަވެސް އެކަން އިނގިތިބެ، ޑޮލަރުން ގަތް ޑްރޯނުތައް ކޮބައިތޯއެވެ. ރަސްމާލެ ހިއްކަން އެންދިހާ ތެލެއް ކޮބައިތޯއެވެ. މިއީ ހުސް އިސްރާފެވެ. އޭގެ ބަދަލުގައި ފަހަށް ރައްކާކުރިނަމަ، ލޯނުތައް ދައްކައިފައިވެސް ރައްޔިތުންގެ ލިމިޓާއި ނުކުޅެ ފަރުޖެހުނީހެވެ. ޤައުމަކީ އިމްޕޯޓަށް ބަރޯސާވާ ޤައުމެކެވެ. އަދި އާންމު ދިރިއުޅުމުގައި ޑޮލަރަށް ބޭނުންޖެހޭ ރައްޔިތުން ތަކެއް އުޅޭ ޤައުމެކެވެ. ސަރުކާރުތަކުން ފިސްކަލް ޕްލޭން އެކުލަވާލަން ޖެހޭނީ މިކަންކަމަށް ރިޢާއަތްކޮށެވެ. އަދު މިވާގޮތުން ފާސްކުރި ބަޖެޓަކީ ކީއްކުރާ އެއްޗެއްކަން ނޭނގޭ ފަދައިން، ޤައުމަށް ވަންނަހާ ޑޮަލަރަކަށް ވާގޮތެއްވެސް ނޭނގެއެވެ. މިއިން ކަމަކާއި އުޅުމަށްވުރެ، އަދު ސިޔާސީންނަށްވެސް މުހިންމުވެފައި ވަނީ ސޯފާއެއްގެ ވާހަކަ ދެއްކުމެވެ.
