ކޮންމެ ސަރުކާރެއް އޮތަސް މިއީ ނުނިމޭ މަޝްރޫއެކެެވެ. އިރުކޮޅުކޮޅާ ގާއަތުރާ ގާނަގާ މަގު ހަދާނެއެވެ. ޖެހިގެން އަންނަ ދުވަހު ކޮންމެވެސް ހޮޅިއެއް ވަޔަރެއް ވަޅުލާން މަގުގެ އެއްފަޅި ކޮނެފައި އެގޮތްމިގޮތަށް ގާތަށް އޮންނާނީ އަތުރާލާފައެވެ. އަޑިގަނޑުތައް ރަނގަޅު ކުރާތަނެއް ދެނެއް ނުފެންނާނެއެވެ. ތާރު އަޅާފައިވާ މަގުތަކުގައި ހެދޭ ވަޅުގަނޑުތައްވެސް ހަމަ މިހެންނެވެ. ވެލި އެޅިފައިވާ ސަރަހައްދުތައް ކަހާލާނެ ބަޔަކުވެސް ނެތެވެ. ބައެއް ހިސާބުތަކުގައި ތާރުގަނޑުގެ ފެންވަރު ދަށްކަމުން ރާޅު ނަގަން އުޅޭކަހަލަ ގޮތަކަށް ހިކިފައިވެސް ހުރެއެވެ.
ދުއްވާ މީހާއަށް ހަމަހީވާނީ ވަލު މަގުން ދުއްވާފައި ދެވޭހެނެވެ. އެއެއްމިއެއް ބަލާނުލައި ވަލު ޖަނާވަރުންތަކެއްހެން ބާރު ދުވެލީގައި އެދާ އެހެން އުޅަނދުތަކަށް ބަލަންޖެހެއެވެ. މަގުގައިވާ ވަޅުގަނޑުތަކަށް ބަަލަންޖެހެއެވެ. ވިލާގަނޑަކަށްފަހު ވަލުތެރޭގައި ގަސްތަކުން ފައިބާ ފެނަށް ބަލަންޖެހޭހެން އިމާރާތްތަކުން ބޮލަށް ފައިބާ ފެނަށްވެސް ބަލަންޖެހެއެވެ. އަދި މިދޭތެރެއިން ކަފިހިހުރަހަށް ބެލުމެއްނެތި ހިނގާމީހުން ކުއްލިއަކަށް މަގުހުރަސްކުރާނެއެވެ. ޤަވާއިދާއި އެއްގޮތަށް ދުއްވާ މީހަކުނަމަ މަގުމައްޗަށް ނުކުންނަންޖެހެނީ ފުރާނަ އަތަށްލައިގެންނެވެ.
އެތަން މިތާ ކަފިހި ހުރަސް ކުރަހާފައި، އެތަން ކަމުނުގޮސްގެން ކުޑަކޮށް ފުސްކޮށްލާފައި އެހެން ދިމާލެއްގައި ކަހިފިހުރަސްޖަހާފައި ހުރެދާނެއެވެ. ރަނގަޅަށް އުޅެން ބޭނުންވާ މީހާއަށްވެސް އެގަހުކޭލެއް މިގަހުކޭލެއް ނޭގޭ މިންވަރަށް ކަންކަން އޮތީ ބޮއްސުންލާފައެވެ. ވަލުމަގުތަކުން ދުއްވަން ޖެހުމުގެ ސަބަބުން ސިއްހީ މައްސަލަތަކާއި ކުރިމަތިވާ މީހުންވެސް މަދެއްނޫނެވެ. މިހުރިހާކަމެއް މިހެން ހުރިއިރުވެސް ގަރާޖަކަށް ގެންގޮސް އުޅަނދު “ރޯޑަށް ވޯދީ” ވޭތޯ ނުވަތު މަގުގައި ދުއްވަން ކަމުދޭތޯ ބަލާ އެބަ ފައިސާ ދައްކަންޖެހެއެވެ. ނަމަވެސް އެބުނާ “ރޯޑު” އޮތީ އެއްވެސް އުޅަނދަކަށް “ވޯދީ” ވާ ފެންވަރަކު ނޫނެވެ. ވާރޭކޮޅެއް ވެހިއްޖެނަމަ އުޅެންޖެހޭ ހާލު އެންމެނަށް އިނގެއެވެ. އިންޖީނަށް ފެން އެޅިގެން ހަލާކުވަނީ ކިތައް އުޅަދުތޯއެވެ.
މަގުތައް ރަނގަޅު ފެންވަރެއްގައި ހެދެންދެން ސަރުކާރުން އުޅަނދުތަކުގެ ރޯޑް ވޯދިނަަސް ދައްކަން ނުޖެހޭ ގޮތަށް އުސޫލު ބަދަލުކުރަން އެބަޖެހެއެވެ
