ވަރަށް ގިނައިން އިވޭ އަޑެކެވެ. ފައިސާ ޗާޕުކުރި ވާހަކައެވެ. ކުރީ ސަރުކާރުން އެކަން ދިފާއުކުރެއެވެ. އަދުގެ ސަރުކާރުން އެކަން ގޯސްކުރެއެވެ. ކުރީ ސަރުކާރުން ބުނަނީ ކޮވިޑްގެ ތަދު އެންމެ އާދައިގެ ރައްޔިތުމީހާއަށް އިހްސާސްކުރެވުނު މިންވަރު ކުޑަކުރެވުނީ ފައިސާ ޗާޕުކުރީތީއެވެ. އަދުގެ ސަރުކާރުން ބުނަނީ އެއީ ފައިސާގެ އަގުވެއްޓި، މިއަދު ޤައުމު އޮތް އިޤްތިސާދީ އަދަވަޅަށް ކައްސާލުމުގެ އެއް ސަބަބުކަމުގައެވެ. ބައެއް ފަރާތްތަކުން ޤަބޫލުކުރަނީ އަދުގެ ސަރުކާރަށްވެސް ކޮންމެވެސް ސިފައެއްގައި ފައިސާ ޗާޕުނުކޮށް ދެން ނުހިފެހެއްޓޭނެކަމުގައެވެ. ނަމަވެސް ފައިސާ ޗާޕުކުރަން މި ޖެހެނީ ކީއްވެތޯއެވެ. އެއީ ސަރުކާރަށް ބަރޯސާވެގެން ސަރުކާރުން ބަލަހައްޓައިދޭ ކުޑަކުދިންތަކެއްހެން މުޅި މުޖުތަމައު އުޅެންޖެހޭ ގޮތަށް ނިޒާމް ބައްޓަން ކުރީމައެވެ. ކޮންމެ އާއިލާއަކުން މީހަކަށް ސިޔާސީ މަޤާމެއް ނުވަތަ ސަރުކާރު ކުންފުންޏަކުން ވަޒީފާއެއް ލިބެންޖެހޭތީއެވެ. ސަރުކާރަކީ ވަޒީފާ ޗާޕުކުރާ މެޝިނަކަށް ވެގެންއުޅޭތީއެވެ.
ބޭނުމަކީ ވޯޓެވެ. ސިޔާސީ މީހުން، އެމީހުންގެ ބާރު ދެމެހެއްޓުމަށެވެ. ނިޒާމް ބައްޓަންކުރަނީ ކޮންމެ ކަމެއްގައިވެސް ކޮންމެވެސް ސިޔާސީ މީހެއްގެ ފައިބުޑަށް ވެއްޓިގެން ނޫނީ ކަންނުކުރެވޭ ގޮތަށެވެ. ވަޒީފާވެސް ހޯދަން ޖެހެނީ މިމަގުންނެވެ. މިމަޤްސަދުގައި ކުދި ވިޔަފާރިތަކުން ކުރާ އެކި މަސައްކަތްތަކުގެ ތެރެއަށް ސަރުކާރުން ވަންނަނީނެވެ. ވަދެ ވާދަވެރި މިނިވަން ވިޔަފާރި ފުޑާލަނީއެވެ. ކުދި ވިޔަފާރިތަކުން ދޭ ޚިދުމަތްތައް ސަރުކާރު ކުންފުނިތަކުން ދޭން ފަށަނީއެވެ. މިކަމުގެ ސަބަބުން ރައްޔިތުން ތިބެނީ ވަޒީފާގެ އަޅުވެތިކަމެއްގައި ބަދެވިފައެވެ. ދައުލަތަށް ލިބޭ އާމްދަނީ ކުރިނާރަނީ މިކަމާއި ހެދިއެވެ. ޖީއެސްޓީގެ ގޮތުގައި ލިބޭ އެއްޗެއްވެސް އިތުރުވާނީ ކުދި އަދި މެދުފަންތީގެ ވިޔަފާރިތަކަށް ހިންދެމިލާނެ ފުރުސަތެއް ލިބިގެންނޫންތޯއެވެ.
މިސިޔާސީ މަޤްސަދު ހާސިލްކުރަން ސަރުކާރުގެ ކުންފުނިތައްވެސް ފުޑާލަނީއެވެ. ކުރީ ސަރުކާރުން ފެނަކަ އަދި އާރްޑީސީއެވެ. އަދުގެ ސަރުކާރުން އެމްޕީއެލްއެވެ. އަދު ދައުލަތް ޤަރަގުނުވެ ފެނުން މަތީގައި އޮތީ ބޮޑު ފައިދާއެއް ޖަހާ ދެތިން ސަރުކާރު ކުންފުންޏެއްގެ ސަބަބުންނެވެ. ނަމަވެސް ކޮންމެ ސަރުކާރެއް އައިސް ފަހަރަކު ކުންފުންޏެއް ފުޑާލާނަމަ، ފައިދާވާ ކުންފުނިތައްވެސް ނުހަނު އަވަހަށް ގެއްލުމުގެ ތެރެއަށް ވެއްޓޭނެއެވެ. މިފްކޯއަކީ ގެއްލުންވާ ތަނެއްކަމުން އެއްއިރެއްގައި އެސްޓީއޯގެ ދަށަށް ކޮށްޕާލީއެވެ. މިފްކޯއަށް ދިމާވާ ގެއްލުމުގެ ބުރަ އުފުލަންޖެހުނީ ކަމާނުވެސް ބެހޭ ކުންފުންޏަކުންނެވެ. ފައިދާވާ ކުންފުނިތަކުގެ ދުވަސްދާ ދުވަހުން، އެއިރަކު އޮންނަ ސަރުކާރަކަށް ހިންދެމިލެވޭނެ ގޮތެއް ދެން ނޯންނާނެއެވެ. ތިމާއަށް ވަޒީފާ ލިބޭނަމަ ވަރިހަމަ ވެފައި އަތްޖަހަން ތިބޭ ރައްޔިތުންނަށް، ހިތިރަހަ ލާނީ ކުންފުނި ބަގުރޫޓުވެގެން މީހުންތައް ވަޒީފާއިން ވަކިކުރަން ފެށީމައެވެ. ފެނަކަ އެއޮތީ އެހާލުގައެވެ. ކުރީ ސަރުކާރުން ވަޒީފާތައް ބެހިއިރު، އެއީ ހަމަ ރަށަށް ހިދުމަތްދޭން ހުރި ފައިސާތައް ތަޅާބުރުވާލުންކަން ނުވިސްނުނެވެ. ތިމާއަށް ލިބޭނަމަ ވަރިހަމައެވެ.
