ޕާޓީތަކުން ބަލަނީ ވީހާވެސް މަދު ބަޔަކު ވޯޓުލާން ނެރެވޭތޯ. އެ ޕާޓީއެއްގެ މެމްބަރުންނާއި ދެން މަގުމަތިން ފަށޭހައިން ގަނެލެވޭ ގްރޫޕެއް ނުކުންނަނިކޮށް އެމީހުންނަށް ވަރިހަމައެވެ. ބޭނުމީ ގޮނޑިއެވެ. ކޮންމެހެން ދިމަކުރާތީ ނިޒާމު، ގިނަ ރައްޔިތުންގެ ބައިވެރިވުމާއި އެކު ފުރިހަމަ ކުރާކަށް ނޫނެވެ. ގިނަ ރައްޔިތުން ތަކެއް ނުކުންނަނަމަ ގަންނަންޖެހޭ މީހުން ގިނަވީއެވެ. މިކަމުގެ ސަބަބުން ދާއިރާތައް ހަގީގީ މާނައިގައި ތަމްސީލުކުރާނެ މެމްބަރުންނެއް މަޖިލީހަކު ނުތިބެއެވެ. ކިތަންމެ ބޮޑު ވައްކަމެއް ނުވަތަ ކުށެއް ކޮށްފައިވެސް ސިޔާސީ ހިޔަލުގެ ނިވަލުގައި ތިބެނީއެވެ. ރައްޔިތުންނަށް ބަސް ބުނަން ލިބެނީ ފަސް އަހަރު ފަހުންނެވެ
މިކަން ބަދަލުވާން ޖެހެއެވެ. ދާއިރާގެ ނުވަތަ ރަށުގެ ނަން ކިލަނބު ކޮށްލާނަމަ، ދާއިރާގެ ރައްޔިތުންގެ ހައްޤުގައި ބަހެއް ނުބުނެވޭނަމަ، ވެރިމީހާ ފޮނުވާހާ އެއްޗެއްގައި ތައްގަނޑު ޖަހަން ތިބޭނަމަ، ރައްޔިތުންގެ އަގްލަބިއްޔަތުން އެ ދާއިރާއެއް ތަމްސީލުކުރާ މެމްބަރު މަޤާމުން ވަކިކުރުމުގެ ބާރު ރައްޔިތުންނަށް ލިބެންޖެހެއެވެ. ހޮވުމުގެ ކުރިން ކިތަންމެ ރައްޔިތުންނާއި ގުޅިގެން ހެޔޮކަމަށް ހެދިގެން އުޅުނަސް، ހޮވޭ ފަހުން ގެއްލޭ މެމްބަރުން ބައިވަރެވެ. ހޮވޭ ފަހުން ސިފަ ބަދަލުވާ މެމްބަރުން ބައިވަރެވެ. ހޮވޭ ފަހުން ކުރިން ބުނިއެތި ކެންސަލްވާ މެމްބަރުން ބައިވަރެވެ. ފަސް އަހަރު މަޤާމުގައި ތިބެ ކަޓު ނަގައިގެން ވިޔަފާރި ފަށާލައިގެން ދަނީއެވެ. ރައްޔިތުންނަށް ކުރެވޭނެ ކަމެއް ނެތީމައެވެ
ފަލަސްތީނުގެ މައްސަލައިގައި ބަސްބުނަން ނުކުރެފައި ތިބި އެތައް މެމްބަރުންނެކެވެ. ރަށުގެ ތަރައްގީ ހުއްޓިފައިވާއިރު ބަހެއް ބުނެނުލާ އެތައް މެމްބަރަންނެކެވެ. ދާއިރާގެ މީހުންގެ ވިސްނުން ފަސްކޮށް، ޕާޓީގެ ވިސްނުން އިސްކޮށް ބަސްބުނާ އެތައް މެމްބަރުންނެކެވެ. ކޮންމެ ދައުރަކުވެސް މަޖިލީހަށް މިފަދަ މެމްބަރުން ވަދެއެވެ. ރައްޔިތުންގެ ހިގީގީ ބާރު ވަނީ ބަނދެވިފައެވެ. އަޅުގަނޑުގެ ހިޔާލަކީ މިކަން ބަދަލު ކުރުމެވެ. ތިބޭފުޅުންގެ ހިޔާލަކީ ކޮބައިތޯއެވެ؟
