ޔާތޮށި ޕާޓީ ވިޔަސް ރީދޫ ޕާޓީވިޔަސް، އެ ޕާޓީތަކަށްޓަކައި ޤުރުބާންވާ އާންމު މެމްބަރުން، ޤުރުބާން ވަނީ އެ ޕާޓީތަކުގެ ފަލްސަފާއަށް ކުރާ އިތުބާރެއްގެ ބޮޑުކަމުންނެވެ. އެ ޕާޓީ ވެރިކަމަށް އައިސް އެ ފަލްސަފާއާއި އެކު ރައްޔިތުނަނަށް ގިނަގުނަ ޚިދުމަތްތަކެއް ކޮށްދެވިދާނެކަމަށް ޤަބޫލުކުރެވޭތީއެވެ. ބައި އަޅަން މި އަންނަ ކުދި ޕާޓީތަކަކީ ބޮޑު ދެޕާޓީ ފަދައިން އެއްވެސް ފަލްސަފާއެއްގައި ތިބި ބައެއް ނޫނެވެ

ކުރީ ސަރުކާރުން ފައިސާ ޗާޕު ކުރީމައި ހޯހޯއޭ ކިއީ މީހުން މިއަދު ވެރިކަމަށް އައިސް އެ ތައްޔާރުވަނީ ކުރިއަށްވުރެ ގިނައިން ފައިސާ ޗާޕުކުރެވޭނެ މާއްދާއެއް ފާސްކޮށް ޤާނޫނަށް އިސްލާހެއް ގެންނާށެވެ. މިކަމާއި ދެކޮޅަށް އެއްޗެއް ބުނެލާނެ މެމްބަރަކުވެސް އެތާކުނެތެވެ. މިއީ ހަޤީގަތެއްކަމުގައި ޤަބޫލުކުރަން ދަތިނަމަ ޙަބަރުތައް ބައްލަވާލައްވާށެވެ

ސާޅީސް އަށް ގަޑިއިރު ތެރޭގައި ފައިސާދޭނެކަމުގައި ވައުދުވެފައި އޮތަތީ އަބަދުމެހެން މިފެންނަނީ އެވާހަކަ ދައްކާތަނެވެ. ނަމަވެސް އެއީ މަސްވެރިކަމުގެ ސިނާއަތަށް ވެފައިވާ ހަމައެކަނި ވައުދެއް ނޫނެވެ. 48 ގަޑި އިރުގެ ވައުދަކީ ވެރިކަމުގެ ފުރަތަމަ ދުވަހު ފުއްދާ ވައުދެއްވެސް ނޫނެވެ. މިކިޔާލަދެނީ މި ވައުދުގެ ފަހަތުގައިވާ ވިސްނުމެވެ. މިއީ ފައިސާއަށްވުރެ މާ ފުޅާ ދާއިރާއެއްގައި ވިސްނައިގެން ދޫކޮށްލި ވައުދެކެވެ

މާފުށިންނާއި، އައްޑޫއިންނާއި، ނިލަންދޫއިންނާއި ހަނިމާދޫ ފަދަ އެތައް ރަށަކަން ހަމަ ހިލޭ އެ ރަށެއްގެ ބަޔަކަށް ބިން ދެނީއެވެ. ބިން ހިއްކީ ރައްޔިތުންގެ ޓެކްސް ފައިސާއިންނެވެ. ނަމަވެސް މާލެއިން މާލެ މީހަކަށް ބިން ދޭން ވެއްޖެއްޔާ މައްސަލައެކެވެ. ބިމުގެ އަގު ބޮޑުވީމައެވެ. ނަމަވެސް ބިމުގެ އަގުބޮޑުވެގެން އުޅެނީ މާލެ ނިކަމެތި ރައްޔިތުން ކޮށްގެން އުޅޭ ކަމަކުން ނޫނެވެ. ވެރިން މިތަން ތޮއްޖެއްސީމައެވެ. ތޮއްޖެހުމުގެ އުނދަގޫ މާލޭ މީހުންނަށްވެސް ވެއެވެ

ދިރިއުޅުމުގެ ވައްޓަފާޅީއާއި އާދަތަކަށް ބަދަލު އަންނަންޖެހެއެވެ. ރާއްޖޭގައި އެންމެ ގިނަ މީހުން މަރުވާ އެއް ސަބަބަކީ ގައިން ގަޔަށް ނާރާ ބަލިތަކެވެ. ބައެއް މީހުން ބުނާތީ އިވެއެވެ. މަރުވާ ވަގުތު ޖެހުމުން މަރުވާނެއެވެ. ނަމަވެސް ހަމަ މަރުގެންދަވާ ފަރާތުން އަންގަވާފައިވަނީ ސަބަބުތަކުގައި ހިފުމަށެވެ. އަމިއްލަ ނަފްސަށް ގެއްލުން ނުދިނުމަށެވެ. އެހެންވީމައި އެފަދަ ތާކުންތާކު ނުޖެހޭ ބަހާނާ ނުދައްކަމާތޯއެވެ

ރިޝްވަތުގެ ވަބާ ބޮޑުވަމުން އައިސް މިހާރު މިއޮތީ ހައްދުފަހަނަ އަޅާފައެވެ. އެޅި ކޮޅަކަށް މަރުދަންޖެހޭ ފަދައިން ރިޝްވަތު ބެހުމާއި ހިފުމުގައިވެސް ދިވެހިން ހައްދުފަހަނައެޅީއެވެ. ޖާޒީބަޔަކަށް ނުވަތަ ދަޅު ކޭހަކަށް ވޯޓު ވިއްކާލަން ފެށި މީހުން، ހާހުން އަގު ކިޔަމުން ގޮސް މިއަދު ވިއްކާލަނީ ވަޒީފާއަކަށް ނުވަތަ މަޤާމުގެ ކުރިއެރުމަކަށެވެ. ކުރިންވިއްޔާ ރިޝްވަތުގެ ފާފައިން ލިބޭ ހާހެއްހާ ރުފިޔާ އަނދާއަޅިޔަށްވީމައި ނިމުނީއެވެ. މިހާރު މުސާރައިގެ ގޮތުގައި ކޮންމެ މަހަކު ލިބޭނީ އަލިފާނެއެވެ. އަނބިދަރިންނަށް ކޮންމެ މަހަކު ކާންދޭނީ އަލިފާނެއެވެ

ރައްޔިތު މީހާގެ އަތުން ނެގޭ ޓެކްސް ބޮޑުކޮށް، ލިބޭ ސަބްސިޑީތަކާއި އިނާޔަތްތައް ކަނޑާލުން ނޫންގޮތެއް ހަމަ ސަރުކާރަށް ނޯންނަނީތޯއެވެ. މިދިޔަ ސަރުކާރުން ބޮޑުކުރި ޓެކްސްއާއިއެކު އަނެއްކާވެސް ސިޔާސީ މަޤާމުތައް މިދައުރުގައިވެސް ވީ އިތުރެވެ. މަޖިލިސް މެމްބަރުންގެ އަދަދުވެސް ވީ އިތުރެވެ. ސިޔާސީ މަޤާމުތައް މަދުކޮށް، އެމީހުންނަށް ލިބޭ މުސާރަ ރިވައިޒްކޮށް ކުޑަކުރުމަކީ ހަގީގަތުގައި އެންމެ ފުރަތަމަ ކުރަންޖެހޭ ކަމެވެ. މަޖިލިސް މެމްބަރުންގެ އަދަދު ވަކި މިނެއްގައި ހިފަހައްޓައި، އެމީހުންނަށް އަމިއްލައަށް މުސާރަ ކަނޑައެޅުމުގެ ބާރު އޮންނައޮތުން ނިމުމަކަށް ގެންނަން ޖެހެއެވެ.

ކުދި އަދި މެދު ފެންތީގެ ވިޔަފާރިތަކަށްވެސް އޮތް އެންމެ ބޮޑު އެއް ގޮންޖެހުމަކީ ވިޔަފާރި ފުޅާކުރާނެ މާރކެޓްތައް ނެތުމެވެ. ރައްްޔިތުން ދިރިއުޅުމެއް ބިނާކުރަން ބަލާއިރު، މާލެއަށް ހިޖުރަކޮށް އުޅެން ޖެހެނީވެސް އުޅޭ ހިތަކުން ނޫނެވެ. އެތައް ޒަމާނެއްވަންދެން ސިޔާސަތުތައް ބައްޓަންކުރިގޮތުގެ ނަތީޖާއަކުން މަޖުބޫރުވެގެން މިތާ އުޅެނީއެވެ. އެހެން ސަރަހައްދެއް ތަރައްޤީކޮށްފިނަމަ، އެއީ ރައްޔިތުންނަށްވެސް ލިބޭ އިތުރު ޗޮއިސްއެކެވެ

ދަރިން ތަރުބިއްޔަތުކުރުމުގެ ޒިންމާއަކީ ބޮޑު ޒިންމާއެކެވެ. ބޮޑު ހަރަދެއްވެސް ހިނގާކަމެކެވެ. ވަޒީފާއަށް ވަގުތު ދީފައި ބެލެނެވެރިއެއް އެންމެ ގިނަ ވަގުތު ހޭދަކުރާނެ އެއްކަމަކީ ދަރިންގެ ތަރުބިއްޔަތާއި ގުޅޭ އެކި ކަންކަމުގައި އަވަދިނެތި އުޅުމެވެ. ހެދުނުގެ ނާސްތާ ދިނުމެވެ. ސްކޫލަށްލާ ބަލައިދިއުމެވެ. ފޮތްތައް ދަބަހަށް އަޅައިދީ ހަމަކޮށްދިނުމެވެ. ޓިއުޝަން ކްލާހަށްލާ ބަލައިދިއުމެވެ. ހޯމްވޯކް ހެދުމުގައި އެހީވެދިނުމެވެ. ސްކޫލުން ބޭރުގައި ހިންގޭ އެކި ހަރަކާތްތަކަށް ގެންގޮސްދިނުމެވެ. މިހެން ގޮސް އެތައް ކަމެކެވެ