ދީނީ ގޮތުން ހާއްސަ ވުމާއި އެކު ރޯދަ މަހަކީ ދިވެހިންގެ އާދަކާދަ އާއިވެސް ގުޅިފައިވާ މަހެކެވެ. އާއިލާ އާއި ރަހްމަތްތެރިންނާއި ބައްދަލުވެލާ މާހެފުންތަކެވެ. ގޭތެރެއަށް ސާފުކޮށްލާ އާބާތުރަ ފިލުވައިލުމެވެ. އައު ރަހަތައް އަޖުމަ ބަލާލަން ތަފާތު ކާތަކެތި ތައްޔާރުކޮށްލުމެވެ. ތަރާވީސްތަކާއި ރޯދަވީއްލުންތަކެވެ. އަދި އެންމެ މުހިންމު ކަމަކަށް އާންމު ދިރިއުޅުމަށްވުރެ އަޅުކަންތަކާއި ގާތްވެލުމެވެ.
ނަމަވެސް ރަނގަޅު ނިޔަތެއްގައި ފެށުނު މިކަންކަން، އަހަރަކަށް ފަހު އަހަރެއް ދިޔައީ ބައެއްގެ ތެރޭގައި ހައްދުފަހަނަ އަޅަމުންނެވެ. އަދު ޢީދަކާއި ޢީދެކެވެ. މުޅި ރޯދަމަހާއި އޭގެކުރިވެސް ވަނީ ބަޔަކު ބޮޑު މަޖާގަނޑަކަށް ހަދާފައެވެ. ރޯދައަށްފަހު ދީނީ ގޮތުން އަންނަ ޢީދު ފާހަގަކުރުމުގައި ދިވެހިން ހައްދުފަހަނަ އެޅިތާ އެތައް އަހަރެކެވެ. އިސްލާމް ދީނާއި ނުގުޅޭ، އަދި ހިންދޫއިންގެ އަޅުކަމެއްގައި ހިމެނޭ ކުލަޖެހުން ވަނީ އާންމު ކަމަކަށް ވެފައެވެ. ދެޖިންސު މަސްހުނިވެ ގައިގޯޅިވާ ޢީދަކަށް ވަނީ ހަދައިފައެވެ. ލަވަޖަހާ ޕާޓީ ކުރުމާއި ނުލައި ފުރިހަމަ ނުވާ ޢީދަކަށް ހަދައިފައެވެ. ބައެއް މީހުން ޢީދަށް ހާއްސަކޮށް ޕާޓީކުރަން މަސްތުވުމުގައިވެސް ޝާމިލުވެއެވެ.
ރޯދައަށް ތައްޔާރުވުމުގެ ނަމުގައި ކުރާ ކަންކަންވެސް މިހާރު ދަނީ ހައްދުފަހަނަ އަޅަމުންނެވެ. މާހެފުންތައް ގޮތްބޮޑު ކުރަމުން ގޮސް އަދު ވެފައިވަނީ ބޭކާރު ހަރަދާއި ކަންދެއްކުމުގެ ހަފްލާތަކަކަށެވެ. މަގުތައް ބަންދުކޮށްގެންނާއި އަޑުގަދަކުރާއިން ލަވަޖެހުމެވެ. ގޭތެރޭގެ އާބާތުރަ ފިލުވައިލުން ހައްދުފަހަނަ އަޅާގޮސް އަދު އެކަންވެސް ވެފައި މިވަނީ އިޝްރާފު ބޮޑު ކަމަކަށެވެ. ކުނިތައްވެސް އުކާލަނީ މަގުމައްޗަށެވެ.
ރޯދަމަހުގައި ވެސް އުޅުން ހުރީ މިހެނެވެ. ކެއުން މަދުކޮށް އަޅުކަމުގައި މަޝްއޫލުވާންވީ މަހަކީ، ކެއުމަށް އެންމެ ހަރަދު ގިނައިން ކުރާ މަހަށް ވެއްޖެއެވެ. ކެއުމުގައި އެންމެ އިޝްރާފު ބޮޑު މަހަށް ވެއްޖެއެވެ. ބާޒާރުގައި އޮންނަ ޑިމާންޑާއި އެކު ކާބޯތަކެތީގެ އަގު އެންމެ އުފުލޭ މަހަށް ވެއްޖެއެވެ. ދުވާލުގެ ބޮޑުބައެއް ބަންދުކޮށްފައި ހުއްޓަސް، ކާބޯތަކެތީގެ ޙިދުމަތްދޭ ތަންތަނަށް ވިޔަފާރީގެ ޢީދެއް އަންނަ މަހަކަށް ވެއްޖެއެވެ. އަޅުކަމަށް ތާވަލެއް ހެދުމަށްވުރެ، ދުވާލު ނިދުމާއި ރޭނގަޑު އެކި ކުޅިވަރަށް ތާވަލު ހަދާ މަހަކަށް ވެއްޖެއެވެ. އިސާހިތަކު ރޯދަ މަހުގެ އަސަރު ގެއްލި، ރޯދަނުހިފާ އުޅޭ މީހުން މުޖުތަމައުގައި ގިނަވެއްޖެއެވެ. ރޯދައަށްހުރެ ނަމާދު އަޅާ މީހުން ގިނަ ވެއްޖެއެވެ. މިފަހުން މިވަނީ މި މާތް މައްސަރަށް ސިޔާސީ ތަޤައްޔަރުކަންވެސް ވަދެފައެވެ. މިދިޔަ ރޯދަމަހުގެ ފަހު ދިހައެއް ދިމާވީ މަޖިލިސް އިންތިހާބުގެ ފޯރިއާއެވެ. އެތައް ބަޔަކު ދުވީ ކެންޑިޑޭޓުން ފަހަތުން ރިޝްވަތު ނަގާށެވެ. މިފަހަރުގެ ރޯދަމަހުގެ ފަހު ދިހައެއް ދިމާވާނީ ކައުންސިލް އިންތިހާބުގެ ފޯރިއާއެވެ. މިހާރުވެސް ރިޝްވަތުގެ ކުޅިވަރު ދަނީ ކުރިއަށެވެ.
ކުރިއާއި ޙިލާފަށް މި ރޯދަމަހު ރޯދަމަހެއް އައިކަމުގެ އިހްސާސެއް ނުކުރެވެއެވެ. އާންމުކޮށް ހޯމަ ބުރާސްފަތީގައި ސުްނަނަތް ރޯދަ ނުހިފާ މީހަކަށްވެސް ރޯދަމަހު ރޯދައަށް ހުންނަ އިރު، އެހެން މަސްމަހާއި ތަފާތުކަން އިހްސާސް ކުރެވޭނެއެވެ. ވައިގެ ތެރޭގައި އަދު މާހައުލުގައިވެސް ތަފާތު އިހްސާސެއް ހުރެއެވެ. މީސްމީޑިއާ އިންވެސް މި ޝުއޫރު ކޮންމެވެސް ވަރަކަށް ފެނިއްޖެއެވެ. މި ރޯދަމަހު ރޯދަމަހެއްގެ އިހުސާސެއް ނުކުރެވެއެވެ.
