ކޮންމެ އަހަރެއްވެސް ނިމި އަނެއް އަހަރަށް މަރުހަބާ ކިޔަން ދާއިރު، ކުރިޔަށް އޮތް އަހަރު ދައުލަތައް އާމްދަނީގެ ގޮތުގައި ލިބޭނެ އަދަދުތައް އަންދަޒާ ކޮށް ޙަރަދުތައް ބަހާލާނެ ގޮތުގެ ޕްލޭނެއް އެކުލަވާލައެވެ. އެކި ސިނާއަތް ތަކުންނާއި، ޓެކްސްގެ ގޮތުގައި ލިބޭނެ އާމްދަނީ އެވެ. ހިލޭ އެހީގެ ގޮތުގައި އަދި އެކި ނަން ނަން ކިޔާ ލޯންތަކުން ލިބޭނެ އާމްދަނީއެވެ. ކުރިޔަށް އޮތް އަހަރު މި އާމްދަނީ އިން ހިންގާނެ މަސްރޫއު ތަކެވެ. މި ހުރިހާ މައުލޫމާތެއް ހިމެނޭހެން ކޮންމެ އަހަރަކު ރައްޔިތުންގެ މަޖިލީހަށް ބަޖެޓް ހުށަހަޅައެވެ. އޭގެ އޮންނަ އަދަދަކާ ކުރާ ޙަރަދަކާއި ދުވަހަކު ދިމާ ނުވިޔަސް ފަރުވާލެއްނެތެވެ.
ކުރިން ދެންނެވުނު އެކި ދިމަ ދިމާލުން ދައުލަތަށް ލިބޭ އާމްދަނީގެ ތެރޭގައި ޖޫރިމަނާގެ ގޮތުގައި ލިބޭ އާމްދަނީވެސް ހިމެނެއެވެ. 2019ވަނަ އަހަރު ޖޫރިމަނާގެ ގޮތުގައި ދުއުލަތައް ވަނީ 233.1 މިލިއަން ރުފިޔާ ލިބިފައެވެ. އެ އަހަރަށް ލިބޭނެ ކަމަށް ލަފާ ކޮށްފައި ވަނީ 197 މިލިއަން ރުފިޔާއެވެ. 2020 ވަނަ އަހަރަށް 169.7 މިލިއަން ރުފިޔާ ލިބޭނެ ކަމަށް ލަފާކޮށް ބަޖެޓްގައި ހިމަނާފައިވެއެވެ. އާމްދަނީ ހޯދަން އަމާޒެއް ޖަހާފައި އޮތްފަދައެވެ. އަމާޒަށް ވާސިލްވާން، ސްޓިކާ ޖެހުމުގެ ބުރަ މަސައްކަތް ބޮޑުންގެ އިރުސާދުގެ ދަށުން ސްޓިކާ ޖަހާ ކުދިންވެސް ކުރިޔަށް ގެންދެއެވެ. ކޮވިޑްގެ ހާލަތާއި ގުޅިގެން މާލެ ސަރަހައްދު ބޮޑު ބަންދެއްގެ ތެރޭގައި އޮންނަން ޖެހުމުން، އަހަރު ނިންމާލަން ޖެހުނީ ކުރީ އަހަރާ ޙިލާފަށް އަމާޒަށް ވާސިލް ނުވެވިއެވެ. ޖޫރިމަނާގެ ގޮތުގައި 2020ވަނަ އަހަރު ލިބުނީ 146.2 މިލިއަން ރުފިޔާއެވެ
އުޅަދު ޕާކް ކުރުމުގެ ގަވާއިދާ ޙިލާފުވެގެން ކުރާ ޖޫރިމަނާއަކީ ޖުމްލަ ޖޫރިމަނާ އާމްދަނީގެ ތެރެއިން އެއްބައެވެ. މިހިގާ 2021ވަނަ އަހަރަށް މިބާވަތުގެ ޖޫރިމަނާ އިން 5.1 މިލިއަން ރުފިޔާ ހޯދަން އަމާޒު ހިފާފަވާއިރު ނުވަތަ ލިބޭނެކަމަށް ލަފާކޮށް އެއްކަލަ ބަޖެޓްގައި ހިމަނާފައިވާއިރު، އަދި އެވަރަކުން ނުނިމެވެ. މަސްތުގެ ދުނިޔަށް ގެއްލޭ މީހުން، ދުވަހެއް ދުވަހަކަށް ޑޯޒް އިތުރު ކުރަން ޖެހޭ ފަދައިން، ޖޫރިމަނާވެސް އެކި ނަން ނަމުގައި ނެގޭ ވަރު އިތުރު ކޮށްގެން މެނުވީ މިހާރު ސަރުކާރަކަށް “ސިކެއް” ނުފިލައެވެ. މިގޮތުން ޕާކިން ޒޯންތަކުގައި ޕާކް ކުރުމަށް ފީ އެއް ނެގުމުގެ އިތުރުން، މާލެ ސަރަހައްދުގައި ރަޖިސްޓްރީ ކޮށްފައިވާ އުޅަދުތަކުން ކޮންޖެޝަން ފީގެ ނަމުގައި ފީ އެއް ނަގަން ވަނީ ސަރުކާރުން ނިންމާފައެވެ. މި ފީތަކުން ދައުލަތައް 2021ވަނަ އަހަރު 36.6 މިލިއަން ރުފިޔާ ލިބޭނެ ކަމަށް ލަފާކޮށް ބަޖެޓްގައި ހިމަނާފައި ވެއެވެ. އެހެން ގޮތަކުން ބުނަނީ ނަމަ، ޕާކިން ޒީނުން ބޭރުގައި ޕާކް ކުރިޔަސް ސަރުކާރަށް ފައިސާ ތަކެއް ދޭން ޖެހެއެވެ. ޕާކިން ޒޯން އެތެރޭގައި ޕާކް ކުރިޔަސް ސަރުކާރަށް ފައިސާ ދައްކަން ޖެހެނީއެވެ. ގެޔަށް ވައްދާ އެދުމަތީ އުޅަދު ބޭއްވިޔަސް ކޮންޖެޝަން ފީ އެކޭ ކިޔާފައި ސަރުކާރަށް ފައިސާތަކެއް ދައްކަން ޖެހުނީއެވެ. ދިވެހިން ފުކެއްވަރު ކުޑަ މާލެއަށް ހިޖުރަކޮށް ތޮއްޖެހިގެން ދިިރިއުޅެނީ ހަމަ އުޅޭހިތުން ކަމަށް ސަރުކާރަށް ހީވާފަދައެވެ
ޖޫރިމަނާ އަކީ މީހުން ނޭދެވޭ އާދަތަކުން ދުރުކުރުވަން ބޭނުން ކުރާ އުކުޅަކަށް ވުރެ އާމްދަނީ ލިބޭ ވަސީލަތެއްގެ ގޮތުގައި ދެކެން ފެށުމުން ވާނީ މިހެންނެވެ. އާމްދަނީ ހޯދާ ވަސީލަތެއްގެ ގޮތުގައި ދެކޭ ކަމުގެ ހެއްކަކީ އެ އާމްދަނީ އިން ދައުލަތުގެ ބައެއް ޙަރަދުތައް ހަމަޖައްސަން ރާވާތީއެވެ. މާނައަކީ ބެޖެޓް އެކުލަވާލަނީ އެ އާމްދަނީ އާއި ނުލާ ޙަރަދުތައް ދެކޮޅު ނުޖެހޭނެ ގޮތަށެވެ
ބައެއް ފަހަރު ބޭރު ޤައުމުތަކުގައި ވެސް ކަން ކަން މި މޭރުމުން ހިގައެވެ. ކޮވިޑްގެ ސަބަބުން އައި އިގްތިސާދީ ހީނަރު ކަމުގެ ތެރޭގައި އެމެރިކާގެ ނިއު ޔޯކްގެ ބައެއް ސަރަހައްދުތަކުގައި ވެސް އެއްބައި ސަރުކާރުގެ އިދާރާތަކުގެ ހިންގުމުގެ ޙަރަދު ފޫބައްދާ ވަސީލަތެއްގެ ގޮތުގައި ރައްޔިތުން އެކި ނަން ނަމުގައި ޖޫރިމަނާ ކުރަން ފެށިއެވެ. މިކަން މިގޮތަށް ހިގާކަން ފާހަގަ ކުރެވިގެން އެރަށުގެ ފިސްކަލް ޕޮލިސީ އިންސްޓިއުޓިން ވަނީ އެކަން އެގޮތަށް ނުކުރުމަށް އަންގާފައެވެ. ހިތާމައަކީ ރައްޔިތުންގެ ހައްގުގައި މިވަރު ބަހެއް ބުނެލާނެ ސަރުކާރުގެ އިދާރާއެއް އަދި މިނިވަން މުއައްސަސާ އެއްވެސް އަޅުގަނޑުމެންގެ މި ރާއްޖޭގައި ނެތްކަމެވެ
ކޮވިޑްގެ ހާލަތުގައި ރައްޔިތުންގެ ތެރެއިން އެތައް ބަޔަކު ވަޒީފާ ގެއްލި އާމްދަނީ ލިބޭނެ ދޮރުތައް ބަންދު ވެގެން ދިޔައިރު، ޖޫރިމަނާތައް މާފު ކޮށްލަދިނިމުގެ ބަދަލުގައި، ފެނުނީ އާ ހިތްވަރަކާއި އެކު އަހަރަށް ކަޑައެޅިފައިވާ ޖޫރިމަނާގެ އަމާޒަށް ވާސިލްވާން ސަރުކާރުން މަސައްކަތް ކުރަމުން ދިޔަ މަންޒަރެވެ. އެއް ޖޫރިމަނާ އިން ނުވިއްޔާ، އެހެން ނަމެއްގައި އެހެން ޖޫރިމަނާތަކެއް ތައާރަފް ކޮށްގެން ނަމަވެސްމެއެވެ. ޖޫރިމަނާގެ މަސްތުގައި ޖެހުނީމާ ވާނީވެސް އެހެންތާއެވެ
