2024 ވަނަ އަހަރުގެ ރޯދަމަހެވެ. ޔަހޫދީ ޕާސްޕޯޓް މަނާ ނުކޮށްގެން ލިޔުމެއް ޝާއިރުކުރީމެވެ. މީހަކު ކޮމެންޓުކުރިއެވެ. އަދި ތިކަން ނުވެގެން އުޅޭ ވަރެއް ނުވޭނޫންހެއްޔެވެ. އަދިވެސް ނުވެއެވެ. މާބޮޑަށްވެސް ލަސްވެއްޖެއެވެ. 2021 ވަނަ އަހަރު އޭރު މެދުހެންވޭރުގެ މެމްބަރު އަލީ އާޒިމްއަށް ސިޓީ ފޮނުވީމެވެ. 2023 ވަނަ އަހަރު ސިޓީ ފޮނުވީމެވެ. އަޑުނާހާނެކަން އިނގޭނަމަވެސް ކުރެވެން އޮތް ކަމެއް ކުރާށެވެ. އެންމެ ފަހުން ނިންމީ މިފަދަ އެތައް ކަމެއްގެ ހައްޤުގައި އަޑުއުފުލަން އަމިއްލަ އަށް މަޖިލީހަށް ކުރިމަތި ލުމަށެވެ. ކަމަކުނުދިޔައެވެ. ފައިސާ ނުބަހާތީއެވެ. އަނެއްކާވެސް ދާއިރާއިން ހޮވީ ވޯޓު ވިއްކާލާފަ ބަހަބަރު މެމްބަރެކެވެ.
މިއީ އެތައް ދާއިރާއެއްގެ ހާލަތެވެ. ފަލަސްތީނުގެ ހައްޤުގައި ދިވެހިންނަށް ކުރެވެން ހުރީ މަދުކަމެކެވެ. ނަމަވެސް ސައިކަލު ބުރަކުން ނިންމާލާކަށް ނުޖެހެއެވެ. މުޅި ބައިނަލަޤްވާމީ ދުނިޔެއަށް މެސެޖެއް ދެވޭވަރު ކަންކަން ކުރެވޭނެއެވެ. ޔަހޫދީ ޕާސްޕޯޓު މަނާކުރިއަސް އެމީހުން އެހެން ޕާސްޕޯޓުތަކުގައިވެސް އެތެރެވެދާނެއެވެ. އެކަން އެކީ ނުހުއްޓުވިދާނެއެވެ. ނަމަވެސް މިދައްކަނީ ކުރެވެން އޮތްކަމެއް ކުރާ ވާހަކައެވެ. ކުރެވެން އޮތް ގޮތަކަށެވެ. ޔަހޫދީއަކު ރާއްޖޭގެ ރަށަކަށް އައިސް ޔަހޫދީ ދިދައެއް ހިފައިގެން އެބުރުނަސް ކުރެވޭނެކަމެއް ނެތެވެ. ރައްޔިތުން ނުކުމެ ކަމެއްކޮށްފިނަމަ ގޯސްވާނީ ރައްޔިތުމީހާއެވެ. އެ ޔަހޫދީ މީހާ ކުއްވެރިއެއް ނުވެއެވެ. ޤާނޫނުތައް ހުރިގޮތުންނެވެ. ނަމަވެސް އެފަދަ ކަމެއްވެސް ނުކުރެވޭނެހެން، ޔަހޫދީ ނިރުބަވެރިންގެ ހައްޤުގައި އެއްވެސް ޝިއާރެއް މި ފަސްގަނޑުގައި ފާޅުކުރުމީ ޤާނޫނީ ކުށަކަށްހަދަންވެސް ވަކާލާތުކުރީމެވެ. ރައްޔިތުން ބަލައެއް ނުގަތެވެ. މިފަދަ އެތައް ކަމެކެވެ. މިލިޔުމާއެކު ވާ ތަސްވީރުގައި އޭގެ ހެކިފެންނާނެވެ. މި ބްލޮގް ހާވަލާނިކޮށް ކޮށްފައިހުރި މަސައްކތްތައް ފެންނާނެއެވެ.
ބޮޑެތި ނަސާރާ ދައުލަތްތަކުގެ މަޖިލީހުގައިވެސް ފަލަސްތީނުގެ ހައްޤުގައި އެބަ އަޑުއުފުލައެވެ. އިޓަލީގެ މަޖިލީހުގައި އެތައް ފަހަރަކު ފަލަސްތީނުގެ ދިދަ ވިހުރުވާލައިފިއެވެ. އަޔަލޭންޑްގެ މަޖިލީހުން އެވަރަށް މަސައްކަތްކުރެއެވެ. ދިވެހިން ވޯޓު ވިއްކައިގެން ހޮވި މަޖިލިސް ބަހަބަރެވެ.
