ކިތައްމެ ކުޑަ މިންވަރެއް ނެގި ނަމަވެސް ވައްކަން ވާނީ ވައްކަމަށެވެ. ނަމަވެސް މި ޤައުމުގައި ބައިތުލްމާލު ލޫޓުވާލީމައި ލިބެނީ އިއްޒަތާއި ގަދަރެވެ. ރިހާކުރު ފުޅި ވަގަށް ނެގީމައި ގޮޅިއަށެވެ. މިކަމުގައި ވެރިން އެކަނި ކުށްވެރި ކުރެވޭކަށް ނެތެވެ. ބައިތުލްމާލު ލޫޓުވާލައިގެން އަންނަ ވެރިޔާ ވޯޓު ގަންނަން ރައްޔިތުން ގާތަށް އައުމުން ކިޔަނީ މަރުހަބާއެވެ. ގިނަ ދިވެހިންނަށް އެއީ މޮޅު މީހެކެވެ. އޭނަ އަތުން އެއްޗެއް ލިބޭނަމަވެ. ހަމައެކަނި ގޯސް ވަނީ ތިމާމެނަށް ނުދީ ހަބަޑަށް ކެއިކަން ފަޅާއެރީމައެވެ.
ޤައުމު ހަމަ މަގަށް އެޅުވެން އޮތީ ފުރަތަމަ ރައްޔިތުން ރިޝްވަތަށް ވޯޓު ވިއްކުން ހުއްޓާލި ދުވަހަކުންނެވެ. ގެރިކިރު ދަޅު ވަގަށްނަގާ މީހާ ބޮލަށް ދަވާދު ދަޅެއް އޮއްސާލާ ގަންހިންގުވާފައި، މިލިއަނުން ދައުލަތް ލޫޓުވާލި މީހާ ވޯޓު ހޯދަން އައީ ގެއަށް މަރުހަބާ ކިޔާ ސައި ދީ ހެދީމައި އެއީ ގޯހެކެވެ.
ފައިސާ ނުބަހާ ވޯޓު ހޯދަން އަންނަ މީހާ އާއި ދިމާލަށް ހުރިހާ ސިޔާސީންނަކީ އެކައްޗެކޭ، ރަނގަޅު އެކަކުވެސް ނޫޅޭނޭ ކިޔާ ބަވައިގަނެފައި، ފައިސާ ބަހާ ކެންޑިޑޭޓު އައީމައި ލޯބިން ބައްދާލަނީއެވެ. އޭނާ ހޮވާފައި، ގޭގެ ސިޓިންގ ރޫމުގައި ތިބެ ގޮވަނީ އޭނަ ގޯސް މީނަ ގޯސް ރަނގަޅު އެކަކުވެސް ނެތޭއެވެ. މިއީ ބުއްދި ހަމަ ޖެހޭ މީހުން ކުރާ ޒާތު ކަންކަންތޯއެވެ. ވެރިން ވައުދު ފުއްދަންވީ ކީއްކުރަންތޯއެވެ. ވައުދު ނުފުއްދިއަސް ވޯޓު ގަނެގެން މަޤާމު ކަށަވަރު ކުރެވެއެވެ. ވެރިން ވައްކަން ނުކުރަންވީ ކީއްވެތޯއެވެ. ވައްކަން ނުކޮށް ދެވަނަ ފަހަރަށް މަޤާމު ހޯދަން ބަހާނެ ފައިސާ ނެރޭނީ ކިހިނަކުންތޯއެވެ. ވެރިން ރައްޔިތުންގެ މާލީ ހާލަތު ރަނގަޅު ކޮށްދޭން އުޅެންވީ ކީއްވެތޯއެވެ. މާލީ ހާލަތު ދަށްމީހުން ގަނެލަން މާ ފަށޭހަވާނެ ނޫންތޯއެވެ.
ރިޝްވަތަކީ ބޮޑުވެގެންވާ ފާފައެއްކަން ނޭގިގެނެއް ނޫނެވެ. ފަގީރު ކަމަކީ އެއްވެސް ހާލެއްގައި ފާފަތަކަށް އަރައިގަތުމަށް އޮތް ހުއްޖަތެއް ނޫނެވެ. ރިޝްވަތުގެ ފާފައާއި ދުރުވާށެވެ. ޤައުމަށްވެސް، ތިމާގެ ދެދުނިޔެއަށްވެސް ބާޖަވެރިކަން އޮތީ އެ މަޤުންނެވެ.
