އޮޑި ބީއްސާލާ ފުރުމުގެ ކުރިން ބުނީ ފެހި ސިގްނަލުގެ ވާހަކައެވެ. ދަތުރަށް ބޭނުންވާ ހަރަދުބަރަދު ހަމަޖެހިފައިވާ ވާހަަކައެވެ. ފަރުތަކާއި ގިރިތަކުން ނެއްޓި މަންޒިލަށް ވާސިލްވާން ދަންނަކަމުގައެވެ. ނުވިތާކަށް ‘އިންތިޤާލީ’ ބޮއްކުރައެއް ފޮނުވައިގެން، ކުރީބައިގައި ދަތުރަށް ދިމާވެދާނެ ދައްޗެއް އޮތްތޯ ބެލިއެވެ. ދިން ޔަގީންކަމާއި އެކު އޮޑިއަށް އެރި އެންމެންހެން އަދު ދަނީ މާޔޫސްވަމުންނެވެ
އޮޑީގައި އަތުޖެހުނު ވަގުތު ފުރަތަމަވެސް އޮޑިބަން ވަޑި އެކަހެރިކުރީއެވެ. ގުޅައިގެން ދޭން އުޅުނު މެސެޖެއް، ދައްކަން އުޅުނު ވާހަަކައެއް އަޑެއް ނޭހިއެވެ. ނުކަތާވަރަށް ފަޅުވެރިން ނާރުވާނެކަމަށް ބުނި އޮޑިއަށް އެރުވި ފަޅުވެރިން ގިނަކަމުން އެއްބަޔަކު އަދިވެސް ތިބީ އެއްފަޅީގައި އެލިގަނެގެނެވެ. އިށީދެލާނެ ތަންކޮޅެއް ނެތިފައެވެ. ބަރުހެލިކަމުން، އޮޑި ކުރިއަށް ކަނޑަނީ ހަމަ ކިރިޔާއެވެ
އޮޑި ތަޅުވާވަރުން ޝަކުވާކުރުމުން ޖަވާބަކީ ކުރިން ދިޔަ އޮޑީގެ ރާޅާހެދި ތަޅުވަނީކަމުގައެވެ. އެބުނާ އޮޑިއެއްގެ ރާޅުން ސަލާމަތްނުވާތާ ދަތުރަށް ފުރައިގެން ވީހާ ދުވަހެއްވީއެވެ. ހަރަދު ހަމަޖެހިފައި ކަމަށް ބުނެ ފެށި ދަތުރަށް ދުވަހެއް ނުވެ ދަތުރުވެރިން އަތުން އެކި ނަންނަމުގައި ފައިސާ ނަގަން ފެށީއެވެ. އޮޑިއަށް އަރާތިބި ވިޔަފާރިވެރިން ފާހަގަކޮށް އެމީހުންގެ އަތުން އަދި އިތުރަށް ނަގަން ފެށީއެވެ. މަސްލަހަތު ގެއްލުވާލާނެހެން ހީވާ ކޮންމެ މީހަކަށްހެން ފަޅުވެރިއެއްގެ ވަޒީފާދީ ހައްލާލަނީއެވެ. ދުވަހަގެ ކޮއްތު ވެސް އަގުބޮޑު ކޮށްފިއެވެ. ނުވިތާކަށް، ބޯހަމަޖައްސާލަން ދިރުބާކޮޅުގައި ދުން އަރުވާލަން ނުކުމެ ހުރި ސޮރު އަތުން އެވެސް އަތުލާ ޖޫރިމަނާ ކޮށްފިއެވެ
މި ކަޅު ދަތުރު ގޮސް ނިންމާ އެ ބީއްސާލަނީ އަހުރެން ދަންނަ ރާއްޖެއަކަށް ނޫނެވެ. ހަމަ ޔަގީނުންވެސް އެއީ ދިވެހީންގެ ރާއްޖެއެއް ނޫނެވެ. އަހުރެން ދަންނަ ރާއްޖެއަކީ އަތޮޅުތަކަކަށް ބެހިފައިވާ ރާއްޖެއެކެވެ. މިތަނަކު އަތޮޅެއް ބަލައިގަންނަ މީހަކު ނެތެވެ. އަހުރެން ދަންނަ ރާއްޖެއަކީ ކުދި ޖަޒީރާ ރަށްތަކާއި، ވިލުނޫ ފަޅުތަކާއި، ސާފު ޖައްވެކެވެ. މިތާގައި ޖެހުނު ފަޅަކާއި ވިލެއް އޮތިއްޔާ ފަސްއަޅާ ހިއްކަނީއެވެ. އަހުރެން ދަންނަ ރާއްޖެއާއި ހިލާފާށް މިތާގައި ގިނައީ ކަދުރު ރުކެވެ. އަދި އަމުދުން ރަށަކަށް ލެފުމުން މި ފެންނަނީ އެމީހަކަށް ފެނުނު ތާކުން ޖެހުނު ގޮތަކަށް ކަމުންދާ މަންޒަރެވެ. މި ލެފުނީ މިނިކާރާއްޖެއަށެވެ
