ކޮންމެ ސިޔާސީ ޕާޓީ އަކުންވެސް ހައްޤުތަކުގެ ވާހަކަ ދައްކައެވެ. ހާއްސަކޮށް އިދިކޮޅުގައި އޮންނައިރުއެވެ. ހައްޤުތައް ހަނިވެގެން ރައްޔިތުންނަށް ކުރާނެ އަސަރާއި ޤައުމަށް ލިބޭނެ ގެއްލުމުގެ ވާހަކައެވެ. ބޭރުގެ ޖަމިއްޔާ ޖަމާއަތްތައް މެދުވެރިކޮށް ބަޔާންތައްވެސް ނެރުވާނެއެވެ. ހަމަ ޤައުމާއި ރައްޔިތުންގެ ހައްޤުގައެވެ. ނަމަވެސް ވެރިކަމަށް އާދެވުމާއި އެކު އެބުނާ ހައްޤުތައް ފުޅާކަމުން ހަނިކުރަން ޖެހިގެން އުޅެއެވެ.
ރައީސް މައުމޫނުގެ ދިގު ތިރީސް އަހަރު ނިމުމަކަށް ގެންނަން މަގުތަކަށް ނިކުތީ ރައްޔިތުންގެ ހައްޤުތައް ހޯދައިދޭށެވެ. އޭރުގެ ހާލަތު ބަދަލުކޮށް އެތައް ހައްޤެއް ލިބުނުކަން ޤަބޫލުކުރަން ޖެހެއެވެ. ނަމަވެސް ދެން އުފެދުނު އެމް.ޑީ.ޕީގެ ވެރިކަމުގައިވެސް ފެނުނީ ކުރިން ހޯދައިދޭން ވަކާލާތު ކުރި ހައްޤުތައް، ފަހުން މާ ބޮޑުކަމަށް ޤަބޫލުކުރެވުނުތަނެވެ. މުގުރާއި އައްޑަނަ ހިފައިގެން އެއްވުންތައް ރޫޅާލަން ސަލާމަތީ ބާރުތަކުން ނުކުތެވެ. އެފަދަ ކަންކަމަށް އޭރު ދިވެހިން އައުކަމުން، އިދިކޮޅުން އޭގެ ފައިދާ ނަގާ، ޖަޒުބާތުގައި ޖައްސުވައިގެން ރައްޔިތުން މަގުތަކަށް ނެރެ ވެރިކަން ބަދަލު ކުރުވިއެވެ.
ދެން އުފެދުނު ރައީސް ޔާމީންގެ ވެރިކަމުގައިވެސް ފެނިގެން ދިޔައީ، ކުރިން ސިޔާސީ ހައްޔަރީންނާއި އެއްވެ އުޅުމުގެ މިނިވަންކަމުގެ ވާހަކަ ދެއްކި މީހުން ދިމާ އިދިކޮޅަށް އަމަލު ބެހެއްޓި މަންޒަރެވެ. އަނބުރުގެ ޤާނޫނު ވުޖޫދުވިއެވެ. އެއްވެ އުޅެވޭނެ ތަންތަން ހަނިކުރިއެވެ. އެތައް އެއްވުމެއް ހާލަތާއި ނުބައްދަލު ބާރުގެ ބޭނުންކޮށް ރޫޅާލިއެވެ. ބައިނަލަޤްވާމީ އެކި ޖަމާއަތްތަކުން ބަޔާންތައް ނެރުނެވެ. 3 އެޕްރިލް 2016ގައި ނޫސްވެރިން ރައީސް އޮފީސް ކުރިމަތީ އިށީދެތިބެ ކުރި އިހްތިޖާޖާއި އެ އަހަރު މާއްދާ 27ގެ ނަމުގައި ކުރި މުޒާހަރާތައް ފާހަގަކޮށްލެވެއެވެ.
ހައްޤުތަކާއި ގޮތް ނޭގޭ މަރުތަކުގެ ވާހަކަ ދައްކަމުން އަނެއްކާވެސް ވެރިކަމަށް އައީ އެމް.ޑީ.ޕީ އިންނެވެ. ސޯލިހުގެ ސަރުކާރުން ފެނިގެންދިޔައީ ފުލުހުން ނެރެގެން އެއިރުގެ އިދިކޮޅު ޕާޓީ އޮފީސް ތެރޭގައި ހިފަހައްޓާލި މަންޒަރެވެ. އެއްވެ އުޅެވޭނެ ތަންތަނުގައި ޤާނޫނުން އަޅުވާފައިވާ ތަޅު ނައްޓުވާލަން ފަސްޖެހުނެއެވެ. އިހުނެކޭ އެއްފަދައިން ސަރުކާރާއި ދެކޮޅަށް ބަސްބުނާ އެތައް ބަޔަކު ވަޒީފާތަކުން ވަކި ކުރިއެވެ. އަދި އަނެއް ބައެއްގެ ދުލުގައި ދަޅުވާ ހަތިޔާރެއްގެ ގޮތުގައި ވަޒީފާތައް ބެހިއެވެ. ނަމަވެސް ފާހަގަ ކޮށްލަން ޖެހޭ ނުކުތާއެއް އެބައޮތެވެ. ޕީ.ޕީ.އެމް ފިކުރުގެ ވެރިކަންތަކަށް ވުރެ އެމް.ޑީ.ޕީ ފިކުރުގެ ވެރިކަންތަކުގައި ހައްޤުތައް ލިބޭ މިންވަރު ބޮޑެވެ. އިސްތިހާރު ކުރި މިންވަރު ނުވިއަސް، ހަމަ ޤައިމުވެސް އެމް.ޑީ.ޕީ އިން ހައްޤުތައް ހުޅުވާލާ މިންވަރު ބޮޑެވެ.
މިހާރު މިވަނީ އަނެއްކާވެސް ޕީ.ޕީ.އެމް ފިކުރުގެ ވެރިކަމެއް އައިސްފައެވެ. ޕީ.އެން.ސީ ނަމަކަށް ކިޔަސް، މަޤާމުތަކުގައި ތިބީ ކުރިން ފެއިލްވި ޕީ.ޕީ.އެމް ވެރިކަމުގައިވެސް ތިބި މީހުންނެވެ. މިފަހަރު އަނބުރުގެ ބަދަލުގައި އޮތީ މީޑީއާ ކޮންޓްރޮލް ބިލެވެ. އެއާއި ދެކޮޅަށް ނޫސްވެރިންނާއި އިދިކޮޅު ޕާޓީތަކުން މުޒާހަރާ ކުރާއިރު، ސިފަވަނީ ހަމަ މަޒީގެ ސޮފުހާތަކެވެ. އައުކަމެއް ނުހިގައެވެ. ރައްޔިތުންވެސް ބުނެއެވެ. ޕާޓީތައް ދެކެ ފޫހިވެއްޖެއެވެ. އެކަމަކު އިންތިހާބެއް އޮންނަ އިރަށް ހޮވަނީ ޕާޓީ ޓިކެޓް އޮންނަ މީހުންނެވެ. ޕާޓީތަކުންވެސް ބުނެއެވެ. މި މަސައްކަތް ކުރަނީ ހައްޤުތައް ހޯދައިދޭށެވެ. އެކަމަކު ބާރު ލިބޭ ދުވަހު ހައްޤުތައް ގިނަކަމުން ފަށަނީ ހަނިކުރާށެވެ.
