ފާޑު ކިޔުމުގެ ނިޔަތަކު ނޫނެވެ. ހަމަ ހިތުގައިވާ ސުވާލެކެވެ. ރާއްޖޭގެ އެކި ކަންކޮޅުތަކުން އައިސް މާލޭގެ ދަތި މާހައުލުގައި ވަޒަންވެރިވެގެން އުޅޭ އެތައް އާއިލާއެކެވެ. ކިރިޔާވެސް ގޮތެއް އޮތްނަމަ، ރަށުގައި ދިރިއުޅެން ބޭނުންވެއެވެ. ސާފުޖައްވެއްގައި، ހެލިފެލިވެ އުޅެލޭވޭނެ މާހައުލެއްގައެވެ. އަދު ގިނަ މީހުން ދިރިއުޅެނީކީ ނޫނެވެ. ގަނަތެޅެނީއެވެ. ރަށުގައި ދިރިއުޅެވެން ނެތް ސަބަބުތައް ގިނައެވެ. ބޭސްފަރުވާގެ ދަތިކަމެވެ. ވަޒީފާގެ ފުރުސަތު ނެތުމެވެ.
ގިނަ މީހުންނަށް ވިސްނިފައި އޮންނަނީ ކޮންމެ ކަމެއްވެސް ވާން އޮތީ ސަރުކާރުން ކޮށްދިނިއްޔާއެވެ. މިސާލަކަށް ބަލަމާތޯއެވެ. ރަށްރަށުން އައިސް ކިޔަވައިގެން މޮޅެތި ޑޮކްޓަރުންނަށް ވެފައިތިބި އެތައް ބައެކެވެ. މާލީ ތަނަވަސްކަން ލިބި ކްލިނިކްތައް ހުޅުވައިގެން ހިންގައެވެ. ކުލި ކިތަންމެ ބޮޑަސް މާލެއިން ބޮޑެތި ޖާގަތައް ނަގައިގެންނެވެ. ނަމަވެސް އަމިއްލަ ރަށުގައި ކުޑަ ކްލިނިކް ގަނޑެއް ހަދާލައިގެން ހިންގާލަން ހިތައްވެސް ނާރަނީއެވެ. ސަރުކާރުން ހޮސްޕިޓަލެއް އެޅިއަސް އެތަނަކަށް ޑޮކްޓަރުންނެއް ނުލިބެއެވެ. ޖެހެނީ ބޭރު މީހުން ގެންނާށެވެ. ބޮޑެތި ވިޔަފާރިތައް ހިންގާ އެތައް ބައެކެވެ. ފަހަރުގައި ރަށުގައި ފިހާރަ ނުހިންގިދާނެއެވެ. އެކަމަކު މިޒަމާނުގައި ރަށުގައި ކުންފުނީގެ އޮފީސް ހުޅުވޭނެއެވެ. ހަމަގައިމުވެސް ސަރުކާރަށް ފާޑުކިޔަންވީމައި ގޮވައެވެ. ހުރިހާ ސަރުކާރު އޮފީހެއް ހުންނަން ޖެހެނީ މާލޭގައިތޯއެވެ.
މިހެން ގޮސް އެތައް ކަމެކެވެ. ގިނަ ދަތިތަކެއް ހުރިކަން ޤަބޫލުކުރަމެވެ. އާބާދީ މަދު ރަށްރަށުގައި އަދި އަމުދުން ދަތިވާނެކަން ދަންނަމެވެ. ނަމަވެސް ފުދޭ ވަރަކަށް މީހުން ދިރިއުޅޭ ރަށްރަށްވެސް އެބަހުއްޓެވެ. އިންޓަނެޓް ލިބެއެވެ. ފެނާއި ނަރުދަމާ ހުރެއެވެ. ބޭންކް ޙިދުމަތްތަކާއި ކޮންމެވެސް ފެންވަރެއްގައި ސިއްހީ ފަރުވާވެސް ލިބެއެވެ. ރަށްރަށުގެ ސްކޫލްތައް މާލޭގެ ސްކޫލްތަކާއި ވާދަކޮށް ވަނަތައް ހޯދައެވެ. މަތީ ތައުލީމް އޮންލައިންކޮށް ހާސިލްކުރެވެއެވެ. ނަމަވެސް ރަށުގެ އިޤތިސާދު އޮންނަނީ މަރުވެފައެވެ. ސުވާލު އުފެދެނީ މިހިސާބުންނެވެ. ރަށަށް އިންވެސްޓް ނުކުރަނީ ކީއްވެތޯއެވެ؟
ހުރިހާކަމެއް އެންމެ ދުވަހަކުން ހައްލެއްވެސް ނުވާނެއެވެ. މާލޭގައި ގަނަތެޅުމީ އަމުދުން ހައްލެއް ނޫނެވެ. މިއީކީ މުސްތަޤުބަލެއް އޮތް ތަނެއް ނޫނެވެ. ސަރުކާރުތަކުން ވާގިވެރި ނުވިނަމަވެސް، ރައްޔިތުންގެ ހިތްވަރާއި އެކު މާލޭގެ އިޤްތިސާދާއި ވާދަކޮށްލާނެ އިޤްތިސާދުތަކެއް ބިނާކުރާތަން ދެކިލާ ހިތްވެއެވެ. އީދެއް އައިސްފިނަމަ ރަށަށް ދެވެއެވެ. އެންމެ ލޯބިވާ ރަށޭ ކިޔާ ފޮޓޯތައް މީސްމީޑިއާ އަށް އަޅައެވެ. ނަމަވެސް އެ ރަށުގެ ހައްޤުގައި ކަމެއް ކޮށްލަންވަނީ ބޮޑުކަމަކަށެވެ. ބަނަވިޔަސް މިސްރާބަށް ދެވޭނީ ދަތުރު ފަށައިގެންތާއެވެ.
