އައްޑޫގައި ވަކި ކަައުންސިލްތަކެއް ހެދުމަށް ނެގުނު ވޯޓާއި ދިމާކޯށް، ރާއްޖޭގައި ކުރިން ވެރިކަންކޮށްފައި ހުރި ބޭފުޅަކު ހިޔާލެއް ދޫކޮށްލިއެވެ. އައްޑޫ ބައިބައިކުރުމުގެ ބަދަލުގައި އައްޑޫގައި ބިދޭސީން އާބާދުކޮށް، ދިވެހި ރައްޔިތުކަން ދޭންވީކަމަށެވެ. ސުވާލަކީ އައްޑޫގައި ނޫޅެވި މާލެއަށް ހިޖުރަކުރަން މަޖުބޫރު ކުރުވި ސަބަބުތައް އެ ބިދޭސީންނާއިވެސް ބައްދަލު ނުކުރާނެތޯއެވެ. ރައްވެހިކަން ހޯދަން ފަސް އަހަރު އައްޑޫގައި ދިރިއުޅެދާނެއެވެ. ނަމަވެސް ފަސް އަހަރު ހަމަވެ ރައްވެހިކަން ލިބޭއިރަށް، އެމީހުންވެސް މާލެ ހިޖުރަކުރާނެ ނޫންތޯއެވެ. އެޖެހުނީ އަނެއްކާ އެމީހުންނަށްވެސް މާލެއިން ފްލެޓް ދޭށެވެ.
އައްޑޫ އެއް އެހެން ރަށެއް ވަކި ނެތެވެ. މާލޭއަށް ބެލިކަމުގައިވިއަސް، ދިވެހިން އަދު ދިވެހިރާއްޖޭގައި ދިރިއުޅެނީކީ ނޫނެވެ. ގަނަތެޅެނީއެވެ. ޑޮކްޓަރަށް ދައްކާލަން، ވަޒީފާއެއް ހޯދަން މާލެއަށް ހިޖުރަ ކުރުމެވެ. ޑޮކްޓަރަށް ދައްކަން އެތައް މަހެއްގެ އިންތިޒާރެކެވެ. އެކި އިޖްތިމާއި މައްސަލަތަކާއި އެކު، ސްކޫލުތަކުގައި ކުދިންގެ ތައުލީމީ ފެންވަރު ދަށްވުމާއި އެކު އަހްލާގީ ފެންވަރުވެސް ދަށް ވަނީއެވެ. ތައުލީމީ ފެންވަރު ކިތަންމެ މައްޗަސް ސިޔާސީއެއްގެ ފައިގައި ދޫލައިގެން ނޫނީ ވަޒީފާ ހަމަނުޖެހެއެވެ.
ކުއްޔާއި، ބޭސްފަރުވާ އާއި އެކި ދަރަނިތައް އަދާކޮށްފައި ގިނަ ބައެއްގެ އަތުގައި ފައިސާއެއް ނެތެވެ. މުދަލުގެ އަގު ދުވަހެއް ދުވަހަކަށް ދަނީ މައްޗަށެވެ. ވަޒީފާ އާއި ދަރިން ގޮވައިގެން ސްކޫލަށް ދެކޮޅަށް ދުވުމުގެ ބޭރުން އަމިއްލަ ކަމަކަށް ވަގުތު ހޯދައިފިއްޔާ ދެން ކުރަން ހުރި ކަމެއް ކުރާނެ ވަގުތެއް ނޯވެއެވެ. ކުދި ތަންތަން ކޮޅުގައި ދިރިއުޅެފައި ބޯހަމަޖައްސާލަން ދާން ޖެހެނީ ކޮފީ އަކަށެވެ.
މިއީކީ މިތަނުގައި ބިދޭސީން އާބާދު ނުކުރެވިގެން ވާކަމެއް ނޫނެވެ. ރަށްވެހިކަން ނުދިނަސް މާލޭގައި ވެސް ދިވެހިންނެކޭ އެއްވަރަށް ބިދޭސީން އިޤްތިސާދުގައި އެބަ ހަރަކާތްތެރިވެއެވެ. ރަށުގައި ދިރިއުޅެން ބޭނުންވާ އެތައް ބަޔަކު ތިއްބަސް އެމީހުންނަށް ދިރިނޫޅެވެނީ، ރަށުގައި ދިރިއުޅެވޭނެ ގޮތެއް ހަމަ ނެތީމައެވެ. ވަޒީފާ ލިބިގެން ޑޮކްޓަރަށް ދައްކަން މާލެ ހިޖުރަކުރަން ނުޖެހޭނަމަ، މާލޭގައި ގަނަތެޅޭކަށް މީހުން ޖަމައެއް ނުވާނެއެވެ.
ގަތަރުފަދަ ޤައުމުތަކުގެ މިސާލު ނަގައިގެން ދިވެހިން ކަންކަން ކުރުން ހުއްޓާލަން ވެއްޖެއެވެ. ދިވެހިންގެ މެދުގައި ކޮރަޕްޝަން ހުރީ އެފްރިކާގެ ޤައުމުތަކާއި އެއް ފެންވަރެއްގައެވެ. ދިރިއުޅުމުގެ ހާލަތު އަހަރަކަށް ވުރެ އަަހަރެއް ދަށަށް ދާއިރު، ޤައުމުގެ ވެރިން އުޅެނީ ނާޅި ގަނޑު ހިފައިގެން އެހެން ޤައުމުތަކުގައި ސަލާން ޖެހުމުގައެވެ. ތަރައްޤީގެ މަގުޗާޓެއް ނެތި، ވޯޓަށް ޓަކައި ކޮންމެ ރަށެއް ދެއަވަށް ދޭތެރޭ އަޅާނީ އެއަރޕޯޓެކެވެ. ފުރަތަމަ އިސްކަން ދޭންވީ ޤައުމުގެ ހާލަތު ރަނގަޅުކޮށް މިތާ ދިވެހިންނަށް އުޅެވޭވަރު ކުރާށެވެ. ބިދޭސީންނަށް ރަށްވެހިކަން ދިނުމުގެ ވާހަކަ އެއީ މާފަހުގެ ކަމެކެެވެ.
