މެންދުރުގެ ދިލަ ހޫނަށްފަހު ހަވީރުގެ ފިނިކަމެވެ. ދުވާލުގެ އަވަދިކަމަށްފަހު ވަރުބަލި ފިލުވާލުމެވެ. ދުރުގައި އުޅެލުމަށްފަހު ބައްދަލުވެލައި ހާލުބަލާލުމެވެ. ކައިރީގައި އަވަށްޓެރި ގޭގެއިން ކުދިން ނުކުމެ ކުޅެން އުޅޭ އަޑެވެ. ފިނިވައިރޯޅި އާއި އެކު ދޫނި ގޮވާ އަޑެވެ. ބޭރު ޖޯލީގައި އާއިލާ އާއި ރަހްމަތްތެރިން ހީ ސަމަސާކުރާ އަޑެވެ. ހޭދަ ކޮށްލެވޭ އުފާވެރި ވަގުތުކޮޅެވެ. އެތައް ގުޅުމެއް ބަދަހިވެ އާލާވެގެންދާ ވަގުތުކޮޅެކެވެ.
ހިތްގަޔާ ނުވާ ކަމެއް ނުހިގައެކޭ ނޫނެވެ. އެ ހަދާންތަކުން ހެވަށްވުރެ ގިނަ މީހުން ހިތުލަނީ ނުބައެވެ. ޒަމާނާއިއެކު އެ ޖޯލިތައް ކަނޑާލައިފިއެވެ. ފަޅުވެއްޖެއެވެ. އޭރު އެފެނުނު ގުޅުންތަކާއި، ހީ ސަމާސާކުރާ އަޑު އަދު މަދުން ނޫނީ ނީވެއެވެ. ދައްކަން މިއުޅެނީ ސީދާ ޖޯލިފަތީގެ ވާހަކައެއް ނޫނެވެ. ގެއްލިދިޔަ ގުޅުންތަކުގެ ވާހަަކައެވެ. އާއިލާ އާއި އަވަށްޓެރިންނާއި އެކު އޮތް ގުޅުމެވެ. އަދު ދުރުތާ ތިމާގެ މީހަކާއި ވާހަކަ ދައްކާލާ ގުޅުން ބަދަހިކުރަނީ މަދު ބައެކެވެ. އަވަށްޓެރިންނަކީ ކޮބައިކަންވެސް ގިނަ މީހުންނަކަށް ނޭގެއެވެ. ކާފަގެ ރަހްމަތްތެރިންނާއި ބައްޕަމެން ގުޅުން ބޭއްވިއެވެ. ބައްޕަގެ ރަހްމަތްތެރިންނަކީ ކޮބައިކަންވެސް އަދު ދަރިންނަކަށް ނޭގެއެވެ. އެ އެއްވުމެއް ނެތެވެ. ގުޅުން ބިނާވުމެއް ނެތެވެ. އެންމެންވެސް ގޮޅިތަކެއްގައި ބެދި ފޯނަށް ގެއްލިފައެވެ.
ދީނުގައިވެސް ވަނީ އާއިލީ ގުޅުން ދެމެހެއްޓުމަށެވެ. އަވަށްޓެރިންނަށް ހެޔޮކޮށް ހިތުމަށެވެ. އާދަކާދައިގައި މިކަން އޮތީ ވަރަށް ހެޔޮކޮށެވެ. އަދު މިދަނީ މި ހެޔޮ އާދަ އެކީހެން ނެތެމުންނެވެ. ގިނަ މީހުންނަށް އާއިލާއާއި އަވަށްޓެރިންނަށްވުރެ އޮފީހާއި ކޮލެޖް ރަހްމަތްތެރިން މާގާތެވެ. ބައެއް ހާލަތްތަކުގައި އަމިއްލި މައިންބަފައިންނަށްވުރެ ވެސް ރަހްމަތްތެރިން އިސްކުރެއެވެ. ދިރިއުޅުމުގެ ހާލަތު ހުރި ގޮތާއި ފެތުރިފައިވާ އިޖްތިމާއި މައްސަލަތަކުގެ ސަބަބުން ކަމުގައި ވެދާނެއެވެ. އިހުގައިވެސް މައްސަލަތައް ނެތީކީ ނޫނެވެ. ނަމަވެސް އޭރު ގުޅުންތައް ވަރުގަދައެވެ. އަދު ގުޅުން ކަނޑާލުމީ ޖޯލި ކަނޑާލުންހާ ކުޑަކަމެކެވެ. އާއިލާއާއި ވަކިވުމީ ޖޯލި ފަޅުކޮށްލުންހާ ލުއިކަމެކެވެ. މިއީ ބަދަލުވާންޖެހޭ ހަޤީގަތެކެވެ.
