ހިޔާލު ފާޅު ކުރުމަކީ ކޮންމެ މީހަކަށްމެ ލިބިގެންވާ ހައްޤެކެވެ

ރައްޔިތުންވެސް ބުނެއެވެ. ޕާޓީތައް ދެކެ ފޫހިވެއްޖެއެވެ. އެކަމަކު އިންތިހާބެއް އޮންނަ އިރަށް ހޮވަނީ ޕާޓީ ޓިކެޓް އޮންނަ މީހުންނެވެ. ޕާޓީތަކުންވެސް ބުނެއެވެ. މި މަސައްކަތް ކުރަނީ ހައްޤުތައް ހޯދައިދޭށެވެ. އެކަމަކު ބާރު ލިބޭ ދުވަހު ހައްޤުތައް ގިނަކަމުން ފަށަނީ ހަނިކުރާށެވެ

އަހުރެން ދަންނަ ރާއްޖެއަކީ ކުދި ޖަޒީރާ ރަށްތަކާއި، ވިލުނޫ ފަޅުތަކާއި، ސާފު ޖައްވެކެވެ. މިތާގައި ޖެހުނު ފަޅަކާއި ވިލެއް އޮތިއްޔާ ފަސްއަޅާ ހިއްކަނީއެވެ. އަހުރެން ދަންނަ ރާއްޖެއާއި ހިލާފާށް މިތާގައި ގިނައީ ކަދުރު ރުކެވެ. އަދި އަމުދުން ރަށަކަށް ލެފުމުން މި ފެންނަނީ އެމީހަކަށް ފެނުނު ތާކުން ޖެހުނު ގޮތަކަށް ކަމުންދާ މަންޒަރެވެ

ދިވެހިރާއްޖެ އަދު މިއޮތީ ވަރަށްވެސް ބޮޑަށް ސަރުކާރު ވަޒީފާއަށް ބަރޯސާވެފައެވެ. ވެރިން ދެކެނީ އެއީ ސިޔާސީ ގޮތުން ބާރުލިބިދޭ ހަތިޔާރެއްގެ ގޮތުގައެވެ. އަމިއްލަ ވިޔަފާރިތަކަށް އަދު ޤާނޫނީ ގޮތުންނާއި މާލީ ގޮތުންވެސް ހަމަ ނޭވާލާން އޮތީ ބޮޑެތި ހުރަސްތަކެވެ

ކިތައްމެ ކުޑަ މިންވަރެއް ނެގި ނަމަވެސް ވައްކަން ވާނީ ވައްކަމަށެވެ. ނަމަވެސް މި ޤައުމުގައި ބައިތުލްމާލު ލޫޓުވާލީމައި ލިބެނީ އިއްޒަތާއި ގަދަރެވެ. ރިހާކުރު ފުޅި ވަގަށް ނެގީމައި ގޮޅިއަށެވެ.

މަޖިލިސް މެމްބަރުންގެ މުސާރަ ކުޑަކޮށް، ކޮމެޓީ އެލަވެންސް ކަނޑާލާ، އަގުބޮޑު ހެލްތް އިންޝިއުރެންސްގެ ބަދަލުގައި އާސަންދަ ހަމަޖައްސާ އަދި ކުރީގެ މެމްބަރުންގެ އިނާޔަތްތައް ކަނޑާލަން ގޮވާލާ ފެށި ޕެޓީޝަން މަޖިލީހަށް ހުށަހަޅައިފީމެވެ